Միացյալ Նահանգները և ՆԱՏՕ-ն սատարում են Ուկրաինային

Ռուսաստանն ԱՄՆ-ին կոչ է անում «հեռու մնալ Ղրիմից»:

ԱՄՆ նախագահ Ջո Բայդենը նախօրեին հեռախոսով զրուցել է ռուսաստանցի պաշտոնակից Վլադիմիր Պուտինի հետ և կոչ է արել նրան դիմել ռուս-ուկրաինական լարված հարաբերությունների թուլացմանն ուղղված քայլերի:

Բայդենը Պուտինին առաջարկել է հանդիպել որևէ երրորդ երկրի տարածքում և քննարկել միջազգային մի շարք հրատապ հարցեր, մասնավորապես` Իրանի միջուկային համաձայնությունը, սպառազենի կրճատումը և, իհարկե, Ուկրաինայի թեման:

Սպիտակ տան խոսնակ Ջեն Սաքիի փոխանցմամբ` Բայդենը Պուտինի հետ զրույցում մտահգություն է հայտնել Ուկրաինայի սահմանների մոտ և բռնազավթած Ղրիմում ռուսական զորամիավորումների կուտակումների կապակցությամբ:

Վերջին շաբաթներին ստացվող տեղեկությունները վկայում են այն մասին, որ ռուսական կողմն աննախադեպ ծավալով ավելացնում է ռազմական ներկայությունն Ուկրաինայի արևելյան սահմանների մոտ:

Այդ է նշել ԱՄՆ պետական քարտուղար Էնթոնի Բլինքենը, ով նախօրեին Բրյուսելում հանդիպել է Ուկրաինայի արտգործնախարար Դմիտրո Կուլեբայի հետ և հավաստիացրել, որ Վաշինգտոնն առանց վերապահումների միանշանակ սատարում է Ուկրաինային Ռուսաստանի հետ լարված հարաբերությունների այս ժամանակաշրջանում:

«Միացյալ Նահանգները վճռականորեն արտահայտում է աջակցությունն Ուկրաինայի ինքնիշխանությանը և տարածքային ամբողջականությանը: Ես այսօր այստեղ դա ցանկանում եմ վերահաստատել Ուկրաինայի արտգործնախարարի ներկայությամբ: Եվ սա առավել կարևոր է այս օրերին, երբ Ռուսաստանը, դժբախտաբար, դիմում է սադրիչ քայլերի: Այսօր մենք տեսնում ենք Ուկրաինայի սահմանների մոտ ռուսական զինված ուժերի ամենամեծ կուտակումը 2014 թվականից ի վեր: Սա մտահոգում է ոչ միայն Ուկրաինային, այլև մեր դաշնակիցներին և գործընկերներին», - ասել է Միացյալ Նահանգների արտաքին գերատեսչության ղեկավարը:

Բրյուսելում Կու...