Իրավապաշտպան Լյուդմիլա Ալեքսեևային ռուսաստանցիները հրաժեշտ են տալու վաղը: Հնարավոր է, որ հոգեհանգստին ներկա գտնվի նաև նախագահ Վլադիմիր Պուտինը: Նրա մամուլի քարտուղար Դմիտրի Պեսկովն այսօր չի բացառել նախագահի մասնակցությունը հրաժեշտի արարողությանը:
Հայտնի իրավապաշտպան, Ռուսաստանում մարդու իրավունքների պաշտպանության շարժման խորհրդանիշ Ալեքսեևան մահացել է դեկտեմբերի 8-ին: Նա 91 տարեկան էր, և մինչև իր կյանքի վերջին օրը զբաղվում էր իրավապաշտպան գործունեությամբ:
Լյուդմիլա Ալեքսեևան երկար տարիներ ղեկավարել է մոսկովյան Հելսինկյան կոմիտեն: Նա հայտնի այլախոհ էր․ 1977 թվականին ստիպված էր արտագաղթել Միացյալ Նահանգներ, Ռուսաստան վերադարձել էր 1989-ին: Նա համոզված էր, որ վաղ թե ուշ Ռուսաստանը դառնալու է եվրոպական ժողովրդավարական երկիր: Ասում էր, որ ինքը չի հասցնի տեսնել այդ Ռուսաստանը, բայց ավելի երիտասարդները անպայման կտեսնեն:
Ալեքսեևան միշտ համագործակցել է իշխանությունների հետ՝ այդ թվում Պուտինի օրոք, ինչի համար ընդդիմադիրները դատապարտում են նրան: Սակայն նրա հեղինակությունն այնքան մեծ էր, որ այդ մոտեցումն անգա...