Այս տարվա առաջին կիսամյակում 33 միլիարդ դրամ քիչ հարկ ու տուրք է մուտք եղել պետական բյուջե, քան նախորդ տարվա նույն ժամանակահատվածում՝ փաստում են Պետեկամուտների կոմիտեի (ՊԵԿ) այսօր ներկայացրած տվյալները։
Այս տարվա հունվար-հունիսին կոմիտեի կողմից ապահովվել է 680.3 միլիարդ դրամ հարկային զուտ եկամուտներ, մինչդեռ նախորդ տարվա առաջին կիսամյակում այդ թիվը կազմել էր 713.3 միլիարդ դրամ։
Այս ցուցանիշով պետբյուջեի զուտ մուտքերը զիջում են միայն անցած տարվան, որովհետև եթե համեմատենք նախորդ տարիների հետ, ապա դրական տարբերությունն առկա է. 2018 թվականի առաջին կիսամյակում հարկերի ու մաքսավճարների տեսքով պետբյուջեի զուտ մուտքերը եղել են 572.9 միլիարդ դրամ, 2017 թվականին՝ 534.5 միլիարդ, 2016-ին՝ 496.6 միլիարդ, իսկ 2015-ին՝ 485.4 միլիարդ դրամ։
Տնտեսագետ, Հայ ազգային կոնգրեսի (ՀԱԿ) ներկայացուցիչ Վահագն Խաչատրյանի խոսքով, հարկերի ու մաքսավճարների անկումը սպասելի էր և, անշուշտ, բացատրվում է կորոնավիրուսով պայմանավորված տնտեսական անկմամբ, ինչպես ողջ աշխարհում։
«Պետք է կանխատեսեինք, որ այսպիսի իրավիճակում հայտնվել ենք, որովհետև ի վերջո, եթե տնտեսությունն ամբողջությամբ մարտ, ապրիլ, մայիս, հունիս ամիսներին չի աշխատում, հասկանալի է, որ այդ պայմաններում հարկերն ավելի քիչ պետք է հավաքվեին: Դեռևս սպասվում է այս վիճակի շարունակություն, որովհետև չգիտենք՝ ինչքան է կորոնավիրուսով պայմանավորված այս իրավիճակը շարունակվելու», - ասաց տնտեսագետը:
Վիճակագրական կոմիտեի համաձայն, այս տարվա առաջին հինգ ամիսներին՝ նախորդ տարվա նույն ժամանակահատվածի հետ համեմատ տնտեսական ակտիվության ցուցանիշը նվազել է 3.9 տոկոսով։
«Պետք է զգուշանալ և հաշվի առնել, որ հաջորդ ամիսներին այս իրավիճակը շարունակվելու է: Սա նշանակում է, որ մենք ունենալու ենք քիչ հավաքված հարկեր, սա նշանակում է, որ մենք պետք է բյուջետային ծախսերի առումով խնդիրներ ունենանք: Կառավարությունը երկու ճանապարհ ունի այս իրավիճակից դուրս գալու. մեկը, որ կամ պետք է բյուջետային փոփոխություններ ունի՝ ծախսերի կրճատումներով, երկրորդը, ուղղակի բյուջեի դեֆիցիտը մեծացնի՝ լրացուցիչ ֆինանսական աղբյուրներ հայթայթելու ճանապարհն ընտրելով», - ասաց Վահագն Խաչատրյանը:
Այն որ այս տարի ծրագրվածից քիչ հարկ ու տուրք է հավաքվելու, նորություն չէ։ Ապրիլի 23-ին կառավարության նիստում ֆինանսների նախարար Ատոմ Ջանջուղազյանն անգամ թիվ հնչեցրեց, թե նախատեսվում է, որ ծրագրվածից շուրջ...
