Երևանի ավագանին միաձայն ու տոնական տրամադրությամբ հաստատեց վթարային երկու շենքերի բնակիչներին նոր բնակարաններով ապահովելու նախագիծը: Ընտանիքների մի մասը մեկ ամսվա ընթացքում կտեղափոխվի Աջափնյակի նորակառույցներ, մյուս մասը կսպասի վարձով բնակարաններում, որոնց վարձավճարը կտրամադրի քաղաքապետարանը:
«Որպեսզի տեղափոխվեն ժամանակավոր, մինչև Սիսակյան 3-ը հանձնվի շահագործման: Ընդ որում Սիսակյան 3-ը ավելի վաղ է հանձնվելու, քան պլանավորված էր», - նշեց Երևանի փոխքաղաքապետ Հայկ Սարգսյանը:
Արցախի 10 հասցեում գտնվող 4-րդ կարգի վթարային շենքից 19 ընտանիքներ հրաժարվել են դուրս գալ:
Հայկ Սարգսյան․ - «Պատճառաբանությունները շատ տարբեր և հաճախ մի քիչ ֆանտաստիկ են թվում: Մարդիկ ասում են՝ մենք չենք ուզում մեկ բնակարան, այլ ուզում ենք երկուսը, չենք ուզում մեկ սենյակ, այլ ուզում ենք երկուսը, չենք ուզում վարձով, ուզում ենք հենց հիմա»:
Արցախի փողոցի 4-րդ նրբանցքի 4-րդ կարգի վթարային շենքի փնտրտուքը ժամեր տևեց: Այն մի ամայի վայրում է և միայն բորբոքված բնակիչների ձայներով է հնարավոր գտնել արդեն իսկ փլուզման պրոցեսի մեջ գտնվող շենքը:
Վեճը քաղաքապետարանի՝ դեպի նոր տուն հեռանալու առաջարկն ընդունած ու նույն առաջարկը չընդունած հարևանների միջև է:
Հանրակացարանային շենքի լիազոր Մարիետա Հովհաննիսյանն ասում է, որ շատերին է համոզել հեռանալ-փրկվել, բայց մնացողները անդրդվելի են․ - «Երկու սենյակ են պահանջում: Մարդ կա, երկու սենյակ ա ստանում, երեք սենյակ ա պահանջում: Մարդ կա, ընդհանրապես իրա մամայի մահից հետո ստեղ չի էկել, մինչև հիմա զանգում, կանչում ենք, իրանք չեն գալիս»:
Ժաննա Խաչատուրովան պնդում է, թե դստեր, թոռնիկի, ամուսնացած որդու հետ քաղաքապետարանի առաջարկած երկու սենյականոցով չեն կարող բավարարվել: Մտադիր չէ հեռանալ, թեպետ շենքը իր աչքի առջև է քանդվում․ - «Ավելի լավ ա քանդվի, քան ես էսքան պայքարից հետո, 32 տարի բնակվելուց հետո անարդարության զոհ դառնամ»:
Ավերակների մեջ ապրող Բաղդասարայնները նույնպես մերժել են երկու մեկսենյականոցի առաջարկը: Ընտանիքի հայրը բացատրում է, որ 13 հոգի են, տղաներից մեկը ամուսնացել է, միջնեկը՝ նշանվել, էլի հարս են բերելու, մեծ տուն է պետք:
Նոր տուն տեղափոխվելու քաղաքապետաանի առաջարկը սեպ է դարձել հարևանների միջև։ Գալինա տատիկը վեճին հեռվից էր հետևում, բայց նա էլ մի լավ տրամադրություն չուներ: Գալինա Միքայելյանի տունը տանիքի տակ է, եթե անձրևային եղանակ է,...