Ճիշտ մեկ շաբաթ կինոարվեստի երկրպագուները հնարավորություն ունեին վայելել «Ոսկե Ծիրան» երևանյան 16-րդ միջազգային կինոփառատոնի արդեն ավանդական դարձած մթնոլորտը, որը լի էր թե՛ նոր ֆիլմերով ու ուշագրավ հանդիպումներով, թե՛ քննարկումներով կամ պարզապես մտքերի փոխանակությամբ, դժգոհության կամ գոհունակության արտահայտություններով և այլն, և այլն:
Այս տարի փառատոնի նոր, երիտասարդ ղեկավար կազմը փառատոնի ծրագրերում որոշակի փոփոխություններ էր մտցրել, որոնք նրանք բավական սահուն ինտեգրեցին փառատոնի ընդհանրական ծրագրերում: Փառատոնի երիտասարդ ղեկավարները՝ գործադիր տնօրեն Հասմիկ Հովհաննիսյանը, ծրագրերի տնօրեն Կարեն Ավետիսյանն ու GAIFF-PRO հարթակի ղեկավար Մելիք Կարապետյանն իրենց իսկ խոսքով՝ արել էին հնարավոր ամեն ինչ փառատոնը ոչ միայն բարձր մակարդակով անցկացնելու, այլև հաջորդ տարի արդեն իսկ նորանոր անակնկալ զարգացումների հիմք նախապատրաստելու համար:
Փառատոնի ամենաուշագրավ փոփոխություններից մեկը Միջազգային խաղարկային և Միջազգային վավերագրական մրցութային ծրագրերի միավորումն էր, նաև «Հայկակական համայնապատկեր» ոչ մրցութային ծրագրի տարալուծումն ու ներառումը՝ արդեն ընդհանուր դարձած մեկ մրցութային ծրագրում:
Հաղթող ֆիլմերը հայտնի կդառնան այս երեկո: Արդեն իսկ քիչ առաջ «Մոսկվա» կինոթատրոնում մեկնարկեց 16-րդ «Ոսկե ծիրան» միջազգային կինոփառատոնի փակման հանդիսավոր արարողությունը, որի ընթացքում քիչ հետո կհնչեն հաղթող ֆիլմերի ու ռեժիսորների անունները:
Փառատոնի հյուրերը՝ կինոռեժիսորներ, կինոքննադատներ, դերասաններ ամեն օր մասնակցում էին տարբեր մամլո ասուլիսների և հանդիպումների: Նրանց հետ զրույցներից պարզ էր դառնում, որ նրանք գոհ են թե՛ փառատոնի ընթացքից, թե՛ փառատոնի կազմակերպչական աշխատանքներից: Նույնը կրկնեց այսօր հանդիպման ժամանակ «Ոսկե Ծիրան»-ի միջազգային ժյուրիի նախագահ, անվանի սցենարիստ և կինոռեժիսոր Ալեքսանդր Մին...
