Շուրջ հինգ ամիս փակ սահմանների հետևանքով կաթվածահար վիճակում հայտնված զբոսաշրջությունը կենդանության նշաններ է ցույց տալիս:
Պրոֆեսիոնալ զբոսավարների հայկական ասոցիացիայի փոխնախագահ Զարուհի Օրբելյանն ասում է՝ սեպտեմբերի 11-ից հետո, երբ արտակարգ դրությունը վերացվեց և բացվեցին Հայաստանի օդային սահմանները, Հայաստան այցելող զբոսաշրջիկների ոչ մեծ ակտիվություն նկատվեց, հատկապես՝ Ռուսաստանից:
«Գիտե՞ք, ոնց որ մի փոքր, մի փոքր շունչներս բացվել է», - «Ազատության» հետ զրույցում նշեց Օրբելյանը:
«Համեմատաբար մնացած շուկաներին՝ ակտիվացել է ռուսական շուկան: Իրենց հետ էլ շատ ավելի հեշտ է, իրենք երբևէ, համարյա թե երբևէ չեն պլանավորում իրենց ճամփորդությունները, միանգամից, հենց ստացվում է, թեկուզ՝ շաբաթ-կիրակի, ուրբաթ-շաբաթ-կիրակի, ճամփորդում են», - ասաց Պրոֆեսիոնալ զբոսավարների հայկական ասոցիացիայի փոխնախագահը:
Մոտ 13 տարի ոլորտում գործունեություն իրականացնող մասնագետը սեփական փորձից գիտի՝ զբոսաշրջային ամենաակտիվ ժամանակահատվածը սեպտեմբերն է: Անցած տարիներին հիմնականում իսպանախոս զբոսաշրջիկների է ընդունել՝ տարեկան առնվազն 40 խումբ: Այս տարի կորոնավիրուսի համավարակի պատճառով ընդամենը մեկ խումբ է հասցրել հյուրընկալել՝ մինչև մարտի 16-ը: Հիմա էլ, ասում է, եվրոպական շուկայից հատուկենտ խմբեր են գալիս, պատճառները մի քանիսն են:
«Բանն այն է, որ իրենք վախ ունեն գալը՝ վախենում են ինքնաթիռի մեջ, ասենք, մի քանի ժամ անընդմեջ գտնվելուց, որովհետև վարակի բունը հենց ինքնաթիռն է: Երկրորդ վախը, որ ունեն՝ ամենամեծը, որ կգան, ու հանկարծ ևս մի ալիք կսկսվի, հերթական լոքդաունի ժամանակ չեն կարողանա վերադառնալ: Դա իրականում շատ մեծ ռիսկ է, որովհետև ես այս տարի հենց ունեցել եմ զբոսաշրջիկ, որոնց ճանապարհել եմ մարտի 15-ին, երբ որ Իսպանիայում արդեն ...
