Ի՞նչ երգ լսել, եթե արդեն հոգնել ես սմարթֆոնիդ չթարմացվող երգացանկից կամ նոր թողարկված երգերի բազմազանության մեջ չես գտնում ճաշակիդ ու տրամադրությանդ համապատասխան որեւէ գործ: BRAVO.am-ը ներկայացնում է նախորդ շաբաթվա նոր ու հետաքրքիր երգերը, տեսահոլովակները, որոնք ոճային ու ժանրային առումով տարբերվում են միմյանցից: Այդպիսով դուք կկարողանաք առանձնացնել ձեր նախընտրելի երգերն ու դրանցից մի քանիսն ավելացնել սիրելի փլեյլիսթում: Project LA - «Eldorado»
Այս շաբաթվա մեր երգացանկն աչքի է ընկնում անիմացիոն տեսահոլովակների բազմազանությամբ։ Այդպիսի մի հոլովակ էլ օրերս ներկայացրել է «Project LA» երաժշտական նախագիծը, որի հեղինակը Լեւոն Արեւշատյանն է, իսկ պրոդյուսերը՝ Սուրեն Սահակյանը։ Նոր հոլովակը ներկայացնում է «Eldorado» երգը` Գոռ Սուջյանի կատարմամբ։ Այն ավելի վաղ ներկայացվել էր համերգի տեսագրությամբ, իսկ այս անգամ երկրպագուները կարող են վայելել երգի նոր ձայնագրությունը։
ԴԵՏՔ - «Մախմուր աղջիկ»
«ԴԵՏՔ» հայկական խումբը եւս նոր տեսահոլովակ ունի։ Տղաները նորովի են ներկայացրել «Մախմուր աղջիկ» երգը, որի կոմպոզիտորն է Խաչատուր Ավետիսյանը, իսկ խոսքերի հեղինակը՝ Սիլվա Կապուտիկյանը։ Խմբի նոր կատարումն աչքի է ընկնում նաեւ քանոնահարուհի Անուշ Կիրակոսյանի նվագակցությամբ, ով, ի դեպ, Խաչատուր Ավետիսյանի ուսանողուհին է եղել։
Freedom Is Expensive - «Down The Roof»
«FIX» (Freedom is Expensive) հայկական փորձարարական դուետը, որի կազմում հանդես են գալիս «Բամբիռ» ֆոլկ-ռոք խմբի անդամներ Նարեկ Բարսեղյանն ու Վարդան Փերեմուզյանը, նոր երգ է ներկայացրել՝ «Down The Roof»։ Երաժշտական նախագիծը, որի սկիզբը դրվել է դեռեւս 2018 թվականին, առաջիկայում կշարունակի նոր սինգլներ թողարկել։ Ինչպես BRAVO.am-ի հետ զրույցում պատմել էր Նարեկ Բարսեղյանը, աշնանը նախատեսում են կենդանի հնչողությամբ համերգներով հանդես գալ, երբ արդեն հնարավոր կլինի մարդաշատ միջոցառումներ անցկացնել։
Surfaces, Էլթոն Ջոն - «Learn to Fly»
Ամերիկյան «Surfaces» երաժշտական խումբը նոր զուգերգ է ներկայացրել Էլթոն Ջոնի հետ՝ «Learn to Fly» (Սովորիր թռչել) երգի հիման վրա: «Ի սրտե հույս ունենք, որ այժմ այս երգը խրախուսման եւ ոգեշնչման աղբյուր կդառնա ավելի, քան երբեւէ»,- իրենց թվիթերյան էջում գրել են խմբի անդամները։
Մայքլ Կիվանուկա - «Light»
Ավելի ու ավելի շատ արտիստներ շարունակում են իրենց երաժշտությամբ կանգնել «Black Lives Matter» շարժման կողքին՝ ընդդեմ ռասայական խտրականության եւ անարդարությունների։ Բրիտանացի երգիչ, երգահան, կիթառահար Մայքլ Կիվանուկան եւս անիմացիոն նոր տեսահոլովակ է ներկայացրել՝ իր «Light» երգի հիման վրա, որն ընդգրկված է 2019-ին թողարկված «Kiwanuka» ալբոմում։
Ջոն Լեջենդ - «Never Break»
Ոգեշնչմանն ու խրախուսմանն է ուղղված նաեւ ամերիկացի երգիչ, դերասան Ջոն Լեջենդի նոր՝ «Never Break» երգը, որն ընդգրկված է օրեր առաջ թողարկված «Bigger Love» ալբոմում։ Երգիչն իր ինստագրամյան էջում հրապարակել է նոր ալբոմի շապիկը եւ կից գրառում կատարել՝ նշելով, որ շուրջ տասնութ ամիս աշխատել են նոր ձայնագրությունների վրա՝ համագործակցելով հրաշալի մարդկանց հետ։ Երկրպագուները նոր հոլովակի մեկնաբանություններում գրել են, որ իսկապես հրաշալի երգ է եւ հույս ունեն՝ Լեջենդը մի օր անպայման այն կկատարի իր համերգների ժամանակ։
Դենիս Լլոյդ - «Alien»
Իսրայելցի երգիչ...