Վարչապետ Փաշինյանը շարունակում է մանրամասներ հրապարակել ղարաբաղյան 44-օրյա պատերազմի վերաբերյալ՝ այս անգամ անդրադառնալով հարցին, թե Հայաստանի առաջին ու երկրորդ նախագահաները ինչու չմեկնեցին Մոսկվա։
Առավոտյան ֆեյսբուքի իր էջում Նիկոլ Փաշինյանը նշել է, որ դեռ հոկտեմբերի 20-ին Արցախի երկրորդ և երրորդ նախագահներ Արկադի Ղուկասյանն ու Բակո Սահակյանը առաջարկել են Հայաստանի և Լեռնային Ղարաբաղի ներկա ու նախկին ղեկավարների հանդիպում կազմակերպել, որը պատերազմի օրերին կլինի ազգային միասնության արտահայտում: Փաշինյանը համաձայնել է։
Հաջորդ հանդիպմանը, սակայն, Ղուկասյանն ու Սահակյանը հավելել են, որ Լևոն Տեր-Պետրոսյանը և Ռոբերտ Քոչարյանը ուզում են մեկնել Մոսկվա, այնտեղ բարձր մակարդակի հանդիպումներ ունենալ ու վերադարձից հետո միայն հանդիպում կազմակերպվի։ Փաշինյանը դարձյալ համաձայնել է, անգամ, իր խոսքով, պատրաստակամություն է հայտնել պետական ինքնաթիռը տրամադրել, որից հետո Արցախի նախկին նախագահները ասել են, թե անհրաժեշտ է, որպեսզի վարչապետը միջնորդի Ռուսաստանի նախագահին, որ նա ընդունի Տեր-Պետրոսյանին և Քոչարյանին՝ որպես հատուկ բանագնացներ:
«Ռուսաստանի նախագահի հետ ես մշտական կապի մեջ եմ: Օր կա՝ հինգ-վեց անգամ հեռախոսով խոսում եմ հետը: Հիմա եթե ինձ հարցնի, այդ ի՞նչ ասելիք ունես, որ ինձ չես կարողանում ուղիղ ասել և դա ուզում ես ասել հատուկ բանագնացների միջոցով, ես ի՞նչ պիտի պատասխանեմ», - շարունակում է Նիկոլ Փաշինյանը՝ հավելելով, թե նույն հարցը առաջացավ Ռուսաստանի արտգործնախարար Լավրովի պարագայում, ում հետ Տեր-Պետրոսյանն ու Քոչարյանը նույնպես ցանկանում էին հանդիպել։
Հայաստանի վարչապետն առաջարկել է այլ տարբերակ՝ կազմակերպել Տեր-Պետրոսյանի ու Քոչարյանի արարողակարգային այց Մոսկվա՝ որպես պաշտոնաթող նախագահներ, ուր նրանք կլինեն Ռուսաստանի պաշտոնաթող նախագահ Դմիտրի Մեդվեդևի հյուրը, ով նաև Ռուսաստանի Անվտանգության խորհրդի նախագահի տեղակալն է, և այցի շրջանակներում փորձել քաղաքավարական հանդիպումներ կազմակերպել ՌԴ նախագահի, արտգործնախարարի և այլ բարձրաստիճան անձանց հետ: Փաշինյանի այս առաջարկը, սակայն, հետաքրքիր չի եղել Հայաստանի առաջին ու երկրորդ նախագահներին։
Փաշինյանը եզրափակում է. «Բակո Սահակյանը ինձ համար անսպասելի հայտարարեց, թե Տեր-Պետրոսյանը և Քոչարյանը Սերգեյ Լավրովի հետ հանդիպման պայմանավորվածություն ունեն: Էդ դեպքում ինձնից ի՞նչ են ուզում. պայմանավորված են՝ թող մեկնեն Մոսկվա, հանդիպեն: Պարզվեց՝ հարցը Ռ. Քոչարյանի անձնագիրն է, որը դատարանում է: Ասացի՝ թող միջնորդություն ներկայացնեն դատարան, ես կխնդրեմ, որ մեղադրանքի կողմը չառարկի անձնագիրը վերադարձնելուն: Այդպես էլ եղավ. դատարանը վերադարձրեց Քոչարյանի անձնագիրը, բայց Տեր-Պետրոսյանն ու Քոչարյանը Մոսկվա այդպես էլ չմեկնեցին»:
Նիկոլ Փաշինյանի գրառմանը ֆեյսբուքում բավականին կոշտ արձագանքել է Հայաստանի առաջին նախագահ Լևոն Տեր-Պետրոսյանի մամուլի խոսնակ Արման Մուսինյանը նշելով, որ նախագահ Տեր-Պետրոսյանը անիմաստ է համարում անդրադառնալ Փաշինյանի հայտարարություններին: «Միևնույն է` նա արդարանալու ոչ մի ճար չունի: Հայ ժողովուրդը նրան երբեք չի ներելու», - գրել է Մուսինյանը։
Օրերս «Ազատության» հետ զրույցում Հայ ազգային կոնգրեսի փոխնախագահ Լևոն Զուրաբյանը հայտարարեց, թե Փաշինյանը պարզապես չի լիազորել Տեր-Պետրոսյանին, որպեսզի առաջին նախագահը կարողանա մեկնել Մոսկվա և բանակցություններ վարել։
«Այո՛, նրանք դիմել էին Նիկոլ Փաշինյանին, որ նաև տրամադրվի, օրինակի համար, Տեր-Պետրոսյանին մանդատ, որ ինքը կարողանա բանակցել և գոնե պահպանել այն, ինչ որ հնարավոր էր պահպանել։ Նիկոլ Փաշինյանը հրաժարվեց դա անել», - նշել է Զուրաբյանը:
«Ազատության» ...
