Պետությունից առանձնապես խոշոր չափերով գումարի հափշտակությանը դրդելու համար մեղադրվող «Ֆլեշ» ընկերության նախագահ Բարսեղ Բեգլարյանը, որն առավել հայտնի է «Ֆլեշի Բարսեղ» մականունով և Հայաստանի նախկին նախագահ Սերժ Սարգսյանի հետ իր մտերմությամբ, չի ընդունում իրեն առաջադրված մեղադրանքը։ «Ազատության» հարցին ի պատասխան ասաց նրա փաստաբան Նիկոլայ Հակոբյանը։
Ինքը՝ Բեգլարյանը, այսօր հրաժարվեց լրագրողների հարցերին պատասխանել։
«Մեղադրանքին ծանոթացանք, մեղադրանքը չի ընդունում, ցուցմունք հետագայում կտրվի, քննությունը կիրականացվի, ամեն ինչ իր տեղը կընկնի», - ասաց փաստաբանը՝ հավելելով. «Գտնում է, որ ինքը հանցավոր արարք չի կատարել, գտնում է որն է, այդպես էլ կա»։
Բեգլարյանի նկատմամբ խափանման միջոց է ընտրվել չհեռանալու մասին ստորագրությունը։ Նա այսօր Հատուկ քննչական ծառայություն էր հրավիրվել՝ հարցաքննության։ Վառելիքի շուկայում գերիշխող դիրք ունեցող ընկերության ղեկավարն անցնում է Սերժ Սարգսյանին առնչվող քրեական գործով: Հայաստանի պաշտոնաթող նախագահին անցած շաբաթ էր մեղադրանք առաջադրվել մոտ կես միլիարդ դրամ գումարի հափշտակությունը կազմակերպելու համար։
Բարսեղ Բեգլարյանն ավելի վաղ հայտնել էր, որ առերեսվել է նախկին գյուղնախարար Սերգո Կարապետյանի հետ: Ըստ մամուլի հրապարակումների՝ հենց Կարապետյանն է ցուցմունք տվել երրորդ նախագահի դեմ:
Հատուկ քննչական ծառայությունը պարզաբանել էր, որ 2013 թվականին՝ նախագահական ընտրություններից ընդամենը մեկ ամիս առաջ, Հայաստանի կառավարությունը հաստատել է գյուղացիների համար մատչելի գներով դիզելային վառելանյութի ձեռքբերման նպատակով պետական աջակցության ծրագիրը: Վառելիք մատակարարելու ցանկություն են հայտնել մի շարք, այդ թվում` «Մաքսհուր» և «Ֆլեշ» ընկերությունները: Ամենաէժան գնային առաջարկը ներկայացրել է «Մաքսհուր»-ը, որի ներկայացուցչի հետ քննարկումներից հետո Գյուղնախարարության պաշտոնյաները որոշել են որպես մատակարար հենց այս ընկերության տվյալները ներկայացնել կառավարության հաստատմանը:
Ինչպես նշվում է ՀՔԾ հաղորդագրությունում, Սերժ Սարգսյանը տեղյակ է եղել, որ ավելի էժան վառելիք է առաջարկում հենց այս ընկերությունը, գիտակցել...