Երևանի ավագանու «Լույս» խմբակցությունը քաղաքապետ Հայկ Մարությանի գործունեությունը կվիճարկի դատարանում, եթե նա անուն առ անուն չհրապարակի՝ քաղաքապետարանի աշխատակիցները որքան պարգևավճար են ստացել տարեվերջին, զգուշացնում է խմբակցության ղեկավար Դավիթ Խաժակյանը: Պարգևավճարների վերաբերյալ Խաժակյանի հարցումը քաղաքապետին դեռ անարձագանք է:
«Հետագայում նաև պատրաստ ենք խնդրի չլուծման դեպքում դիմել վարչական դատարան՝ կրկին Երևանի ՏԻՄ օրենքով սահմանված կարգով վիճարկելու քաղաքապետի գործողությունը, քանի որ այդ գործողությունը վնասում է թափանցիկությանը», - նշեց Դավիթ Խաժակյանը։
«Երևան քաղաքում տեղական ինքնակառավարման մասին» օրենքն է պահանջում պարգևատրման վերաբերյալ քաղաքապետի կարգադրությանը կից հրապարակել հավելվածը, որտեղ, ըստ Դավիթ Խաժակյանի, պետք է լինի պարգևավճարի հասցեատերերի անունների ողջ ցանկը:
«Համաձայն նորմատիվ իրավական ակտերի մասին օրենքի քաղաքապետի կարգադրությունը համարվում է անհատական իրավական ակտ, և հավելվածը դրա անբաժանելի մի մասն է, ուստի ստացվում է, որ իրենք չեն կատարել Երևանի ՏԻՄ օրենքի պահանջը», - ընդգծեց «Լույս» խմբակցության ղեկավարը։
Ավագանու ընդդիմադիր անդամը հիշեցնում է՝ նախկին քաղաքապետ Տարոն Մարգարյանն անգամ չէր զլացել հրապարակել, որ ինքն իրեն մեկ ամսվա աշխատավարձի չափով պարգևատրել է, ինչն աղմուկ էր բարձրացրել: Գուցե հանրության արձագանքի՞ց է վախենում գործող իշխանությունը՝ Դավիթ Խաժակյանի այս կասկածները փարատում է Երևանի փոխքաղաքապետ Հայկ Սարգսյանը: «Բայց կարող եմ ասել, որ Երևանի քաղաքապետը չի ստացել պրեմիա, զրո։ Ես ուզում եմ փարատեմ բոլորի էս կասկածները, որ մենք ոչ մի բանից մտավախություն չունենք։ Ինչո՞ւ՝ որովհետև մենք բաց, թափանցիկ և հստակ ենք», - ասաց Երևանի փոխքաղաքապետը։
Հայկ Սարգսյանը, մատնացույց անելով քաղաքապետարանի պաշտոնական կայքում հրապարակված կարգադրությունը, պնդում է, որ հանրությունից ոչինչ չեն թաքցնում: Երևանի քաղաքապետարանի և համայնքապետարանների շուրջ 2 հազար աշխատակցի բաշխվել է մեկ միլիարդ 200 միլիոն դրամի չափով ...