Հատուկ քննչական ծառայությունը տեղեկացնում է՝ Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գևորգյանի վերաբերյալ քրեական գործի նախաքննությունն ավարտվել է:
«2008 թվականի մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՔԾ-ում քննվող քրեական գործով վարույթն իրականացնող մարմինը, համարելով, որ գործով ձեռք բերված ապացույցները բավարար են Հայաստանի Հանրապետության պաշտոնաթող նախագահ Ռոբերտ Քոչարյանի, Զինված ուժերի գլխավոր շտաբի պետի պաշտոնը զբաղեցրած Սեյրան Օհանյանի, Պաշտպանության նախարարի տեղակալի պաշտոնը զբաղեցած Յուրի Խաչատուրովի և նախագահի աշխատակազմի ղեկավարի պաշտոնը զբաղեցրած Արմեն Գևորգյանի վերաբերյալ մեղադրական եզրակացություն կազմելու և գործը դատարան ուղարկելու համար, վերը նշված անձանց մասով քրեական գործի նախաքննությունն ավարտել է», - ասված է հաղորդագրությունում:
Ռոբերտ Քոչարյանը, հիշեցնենք, մեղադրվում է սահմանադրական կարգը տապալելու և առանձնապես խոշոր չափերով կաշառք ստանալու մեջ, Սեյրան Օհանյանը և Յուրի Խաչատուրովը մեղադրվում են սահմանադրական կարգը տապալելու մեջ, իսկ Արմեն Գևորգյանը մեղադրվում է սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ:
Միաժամանակ, Ազգային ժողովի փոխնախագահներ Լենա Նազարյանի և Ալեն Սիմոնյանի կողմից շրջանառության մեջ է դրվել «2008 թվականի մարտի 1, 2-ին Երևան քաղաքում տեղի ունեցած իրադարձությունների ժամանակ անձանց կյանքին կամ առողջությանը պատճառված վնասների հատուցման մասին» օրենքի նախագիծ։ Սիմոնյանն «Ազատությանը» փոխանցեց, որ նախագիծն արդեն իր և Նազարյանի կողմից ստորագրված և հանձնված է Ազգային ժողովի նախագահին։
«Նախագիծը արդեն իմ և Լենա Նազարյանի կողմից ստորագրված է և հանձնված է Ազգային ժողովի նախագահին։ Ազգային ժողովի նախագահը այն կուղարկի կառավարություն, հետագայում կառավարությունը կտա իր եզրակացությունը օրենքի նախագծի հետ կապված, դրանից հետո օրենքը կգա Ազգային ժողով կրկին, և համապատասխան հանձնաժողովը այն կքննարկի, որից հետո օրենքը կմտնի Ազգային ժողովի լիագումար նիստ։ Ես ենթադրում եմ, որ մենք պետք է ամեն ինչ անենք, որ այս տարվա մարտին այդ նախագիծը արդեն լինի Ազգային ժողովում՝ դա շատ կարևոր է ինձ համար անձամբ և Լենա Նազարյանի», - ասաց Ալեն Սիմոնյանը:
Խոսելով նախագծի անհրաժեշտության մասին՝ նա նշեց. - «Նախագիծը անհրաժեշտ է, որ մենք ֆիքսենք, նախ և առաջ, այդ իրադարձությունները, և այդ իրադարձությունների պատճառով տուժածները զգան, որ Հայաստանի Հանրապետությունը պատասխանատու է, որ Հայաստանի Հանրապետությունը ֆիքսել է և ընդունել է այն իրադարձությունները, որոնք որ տեղի են ունեցել, և պարտավոր է իր համաքաղաքացիներին, այսպես ասած, տեր կանգնել»։
Նախատեսվում է, որ հատուցման չափը, կարգն ու պայմանները կսահմանվեն կառավարության որոշմամբ։ «Ակնհայտ է, որ որևիցե չափ չի կարող լինել ընտանիքի անդամին, երեխային ինչ-որ հատուցում տրամադրելու առումով, և այդ թիվը երբևիցե ճիշտ չի կարող լինել, որովհետև մարդը և առավել ևս հայ մարդը անգին է, և էդ հատուցումը՝ մենք աշխատում ենք «փոխհատուցում» բառի փոխարեն օգտագործել «հատուցում» բառը, հատուցման չափը կորոշի Հայաստանի Հանրապետության կառավարությունը», - ասաց Ալեն Սիմոնյանը:
2008-ի մարտիմեկյան իրադարձությունների ժամանակ զոհված Գոռ Քլոյանի հայրը՝ Սարգիս Քլոյան...
