Հայաստանի ժողովրդական կուսակցության (ՀԺԿ) փոխնախագահ Գրիգոր Հարությունյանի համոզմամբ, Հայաստանի երկրորդ նախագահ Ռոբերտ Քոչարյանը վաղուց պետք է մեկուսարանում լիներ:
Անցած 21 տարիների ընթացքում բազմիցս են խոսել, որ 1998 թվականի նախագահական ընտրություններում նա զավթել է ժողովրդի իշխանությունը և պետք է պատասխան տա դրա համար:
Գրիգոր Հարությունյանը, ով Մեղրիում Կարեն Դեմիրճյանի նախընտրական շտաբի ղեկավարն էր, հիշում է, թե 1998-ի նախագահական ընտրություններում ինչպիսի ընտրակեղծիքներ ու ճնշումներ էին բանեցվում՝ հօգուտ Ռոբերտ Քոչարյանի․ - «Երբ որ ընտրություններից հետո ոստիկանապետը հանդես էր գալիս բոլոր տեղերում, ասում էր, որ Քոչարյան Ռոբերտը իր քեռին է, ինչպես է փորձում ճնշումներ գործադրել իմ նկատմամբ, ստիպել, որպեսզի նյութերը փոխենք: Նաև էնպիսի օրինակներ ունենք էնտեղ, որ Ագարակի միջնակարգ դպրոցում շուրջ 1100 քվեաթերթիկ հանձնաժողովի նախագահը թողել, փախել էր: Դեմիրճյանի օգտին քվեաթերթիկները վերցրել էին, 1100 քվեաթերթիկ դրել էին Ագարակի միջնակարգ դպրոցում»:
«Ազատություն». - Ձեր կարծիքով՝ բոլոր հիմքերը կա՞ն, որ ՀՔԾ-ն ավելի հեռուն գնա և քրեական գործ հարուցի՝ ընտրությունները կեղծելու դրվագով։ Դուք փաստեր եք ներկայացնում, Ձեզ նման շատերը կլինեն, ովքեր կարող են ցուցմունքներ տալ։
Հարությունյան. - Շատ փաստեր կարող են ներկայացվել, բայց ամբողջ խնդիրը նա է, որ այդ քվեաթերթիկներից բան չի պահպանվել, արդեն ոչնչացվել են: Եվ մենք նաև այսպիսի փաստեր ունեինք, որ մեծ տոպրակներով Կարեն Դեմիրճյանի օգտին քվեարկած քվեաթերթիկներ Սևանա լճում են փորձել ոչնչացնել, պատուհաններից են գցել դպրոցների:
«Ազատություն». - Կարծում եք, որ դժվա՞ր կլինի ապացուցել։
Հարությունյան. - Չէ, լավ աշխատելու պայմաններում հնարավոր է: Եվ կարևորը ժողովուրդը գիտի, որ հանցագործություն է կատարվել, ժողովուրդը համոզված է: Իսկ լավ քննության դեպքում փաստեր հնարավոր է գտնել, և Շիրխանյանն էլ պետք է ավելի մանրամասնի, որովհետև իրենք են եղել այդ խոհանոցում։
Անդրադառնալով Պաշտպանության նախկին փոխնախարար Վահան Շիրխանյանի բաց նամակին, որտեղ վերջինս նշում է, թե Քոչարյանը 27 տոկոս քվեն դարձրեց 59 տոկոս և իրեն հռչակեց Հայաստանի նախագահ, Գրիգոր Հարությունյանը հակադարձում է, Ռոբերտ Քոչարյանին որևէ մեկը 27 տոկոս ձայն չի տվել․ - «Հինգ տոկոս էլ նա վարկանիշ չուներ: էն էլ կարող ա լինել զորքի-բանի միջոցով: Թե ինչի ա բարձրացնում Շիրխանյանը տոկոսները, չեմ հասկանում»:
Հարցին, թե ինչու Կարեն Դեմիրճյանը չվիճարկեց ընտրությունների արդյունքները՝ եթե հստակ էր, որ ինքն էր ընտրված նախագահը, Գրիգոր Հարությունյանն արձագանքեց, թե Դեմիրճյանը որոշեց չգնալ առճակատման, նախընտրեց այլ ճանապարհ, ստեղծեց կուսակցություն՝ ՀԺԿ-ն, և Վազգենի Սարգսյանի հետ «Միասնություն» դաշինքով 1999-ի խորհրդարանական ընտրություններում ջախջախիչ հաղթանակ տարավ, որից հետո տեղի ունեցավ եղավ հոկտմբերի 27-ի ոճրագործությունը։
«Ազատություն»․ - Ինչո՞ւ Վազգեն Սարգսյանը և նրա կողմնակիցները, ասենք Վահան Շիրխանյանը, այն ժամանակ չբարձրաձայնեցին, որ այսօրինակ խախտումներ են տեղի ունեցել, որ իրականում հաղթողը Դեմիրճյանն էր, բայց նրա ձեռքից հաղթանակը խլ...