Մոտ տասը ժամ շարունակված լռությունից հետո՝ երեկ ուշ երեկոյան, Կառավարության ղեկավարը պաշտոնապես հաստատեց՝ Ադրբեջանի զինված ուժերը հատել են Հայաստանի պետական սահմանը և խորացել մինչև 3,5 կիլոմետր՝ Սյունիքի Սև լճի հարակից տարածքում։ «Դա ոտնձգություն է Հայաստանի Հանրապետության ինքնիշխան տարածքի նկատմամբ», - ընդգծեց վարչապետի պաշտոնակատար Նիկոլ Փաշինյանը հատուկ այս հարցով հրավիրված Անվտանգության խորհրդի նիստում։
«Որևէ կերպ չենք կարող հանդուրժել ու համակերպվել ստեղծված իրավիճակի հետ և այսօր մենք Անվտանգության խորհրդի նիստում պետք է քննարկենք այս պահին առկա իրավիճակն ու մեր հետագա անելիքները, հնարավոր սցենարները և այդ սցենարների միջև առկա ներքին փոխկապակցվածությունները», - ասել է նա:
Պնդելով, թե իրավիճակն առնվազն մերձճգնաժամային է, եթե ոչ՝ ճգնաժամային, Փաշինյանը միաժամանակ տեղեկացրեց, որ ադրբեջանական զինուժը առաջխաղացման հասնելիս մարտական գործողությունների չի դիմել, զենք չի գործադրել։ «Իհարկե առանձին քննարկման առարկա է, թե ինչու և ինչպես է հնարավոր դարձել նման գործողությունը, բայց պետք է արձանագրել, որ սա իր բնույթով, ըստ էության, դիվերսիոն անցում է», - ընդգծեց նա։
Ըստ Փաշինյանի, ադրբեջանական զինուժն իր առաջխաղացումը փորձում է հիմնավորել քարտեզներով, որոնք հայկական կողմը մտացածին և կեղծ է համարում։
Դեռ երեկ՝ օրվա առաջին կեսին, Պաշտպանության նախարարությունը հայտարարել էր, թե տեղում բանակցություններ են ընթանում՝ տարաձայնությունները հարթելու համար։ Ժամեր անց՝ ուշ երեկոյան հրավիրված Անվտանգության խորհրդի նիստը և Փաշինյանի ելույթը, սակայն, ակնհայտ դարձրին, որ այդ բանակցությունները, գոնե երեկ, դրական արդյունք չեն տվել։
Հավաստիացնելով, թե նախապատվությունը տալու են դիվանագիտական լուծմանը, Փաշինյանը միաժամանակ փաստեց՝ մյուս տարբերակները բացառված չեն․ - «Մեր առաջնային ծրագիրը բանակցությունների միջոցով, նաև դիվանագիտական եղանակներով այս խնդիրը լուծելն է: Բայց սա տարբերակներից մեկն է»:
Ըստ Փաշինյանի, երեկ Պաշտպանության նախարարությունը մարտավարական տեղաշարժեր է իրականացրել։ Պաշտպանության նախարարության հաղորդմամբ էլ՝ 5-րդ զորամիավորումում հայտարարվել է ուսումնական տագնապ, ռազմական տեխնիկան բերվել է մարտական վիճակի, 2-րդ զորամիավորումում իրականացվել են հրամանատարաշտաբային զորավարժություններ, 4-րդում՝ անվտանգության կանոնների պահպանման պարապմունքներ։
«Մեզ անհրաժեշտ է պահպանել սառնասրտություն, մյուս կողմից՝ անհրաժեշտ է լինել հետևողական մեր պետական և ազգային շահերի պաշտպանության տեսանկյունից, և մենք նաև այսօր պետք է որոշումներ կայացնենք անելիքների ու հետագա գործիքակազմի վերաբերյալ», - հայտարարեց Փաշինյանը Անվտանգության խորհրդի նիստում:
Թե ինչ որոշումներ են կայացվել՝ առայժմ հստակ չէ։ Հայտնի է միայն, որ երեկ երեկոյան Հայաստանի պաշտպանության նախարարի պաշտոնակատարը հեռախոսազրույց է ունեցել ռուս գործընկերոջ հետ։ Ըստ ռուսական կողմի՝ Սերգե...