Հունիսի 12-ին ՀՀ ԱԺ տարածքային կառավարման, տեղական ինքնակառավարման, գյուղատնտեսության եւ բնապահպանության ու ՀՀ ԱԺ ֆինանսավարկային եւ բյուջետային հարցերի մշտական հանձնաժողովների համատեղ նիստում Վարազդատ Կարապետյանի եւ Մանե Թանդիլյանի նախագահությամբ քննարկվել են տեղական ինքնակառավարման մարմիններին, գյուղատնտեսության, բնապահպանության եւ էկոնոմիկայի ոլորտներին 2018 թվականի ֆինանսական հատկացումներն ու ծրագրերի կատարողականները:
ՀՀ ֆինանսների նախարար Ատոմ Ջանջուղազյանը, ՀՀ շրջակա միջավայրի նախարար Էրիկ Գրիգորյանը, ՀՀ էկոնոմիկայի նախարար Տիգրան Խաչատրյանը, ՀՀ տարածքային կառավարման եւ ենթակառուցվածքների նախարարի տեղակալ Վաչե Տերտերյանը, Երեւանի քաղաքապետ Հայկ Մարությանն ու մարզպետները ներկայացրել են հաշվետու տարվա ֆինանսական հատկացումներն ու ծրագրերի կատարողականները:
Ատոմ Ջանջուղազյանի տեղեկացմամբ` հաշվետու տարում բոլոր ծրագրերն ամբողջությամբ ֆինանսավորվել են, շեղումները պայմանավորված են եղել բացառապես ծրագրերի բովանդակության փոփոխություններով:
ՀՀ բնապահպանության նախարարությանը հատկացվել է 5 մլրդ դրամ, որից օգտագործվել է 3,9 մլրդ դրամ, կատարողականը կազմել է 79 տոկոս, ՀՀ գյուղատնտեսության նախարարությանը հատկացվել է 6 մլրդ 484 մլն դրամ, օգտագործվել է 5,7 մլրդ դրամ, կատարողականը կազմել է 88 տոկոս:
2018 թվականին համայնքների բյուջեներին որպես դոտացիա տրվել է նախատեսված չափով` 48,2 մլրդ դրամ:
Մարզպետարանները մարզերում իրականացրել են ծրագրեր, որոնք ներառված են բյուջետային դասակարգման մի քանի բաժիններում` մարզպետարանի պահպանման ծախսեր, մշակութային միջոցառումներ, ճանապարհների պահպանության, սոցիալական փաթեթի, հանրակրթության բնագավառի ծրագրեր:
ՀՀ Արագածոտնի մարզն օգտագործել է 5,6 մլրդ դրամ, կատարողականը կազմել է 97,4 տոկոս, Արարատի մարզն ստացել է 7,97 մլրդ դրամ, կատարողականը՝ 99,2 տոկոս, Արմավիրի մարզին հատկացվել է 8,3 մլրդ դրամ, կատարողականը կազմել է 99,6 տոկոս, Գեղարքունիքի մարզն իր ծրագրերն իրականացրել է՝ ունենալով 8,6 մլրդ դրամ, կատարողականը 95,6 տոկոս է եղել:
Լոռու մարզին հատկացվել է 8,7 մլրդ դրամ, կատարողականը կազմել է 99,7 տոկոս:
Կոտայքի մարզում ծրագրերն իրականացրել են՝ ունենալով 7,4 մլրդ դրամ, որից օգտագործվել է 89 տոկոսը, Շիրակի մարզին հատկացվել է 8,8 մլրդ դրամ, կատարողականը կազմել է 100 տոկոս, Սյունիքի մարզին հատկացվել է 5 մլրդ 578 մլն դրամ, որի կատարողականը կազմել է 99 տոկոս, Վայոց ձորի մարզում բյուջետային ծրագրերն իրականացրել են՝ ծախսելով 2,6 մլրդ դրամ, կատարողականը կազմել է 98,7 տոկոս: Տավուշի մարզն ունեցել է 5,2 մլրդ դրամ, կատարողականը կազմել է 95 տոկոս:
Թվային ցուցանիշներն ու կատարված ծրագրերը ներկայացնելուց հետո ոլորտների ներկայացուցիչները պատասխանել են պատգամավորների հարցերին, որոնք հիմնականում վերաբերել են բնապահպանությանն ու ոռոգման համակարգի խնդիրներին, օրենսդրական բարեփոխումներ իրականացնելու անհրաժեշտությանը, Սեւանա լճի մակարդակին ու մաքրման աշխատանքներին, հանքավայրերի շահագործման նպատակահարմարությանը եւ այլն:
ՀՀ շրջակա միջավայրի նախարար Էրիկ Գրիգորյանն ի պատասխան Սեւանա լճի մակարդակի վերաբերյալ հարցի նշել է, որ այն 1սմ-ով ցածր է նախորդ տարվա համեմատությամբ...
