Մարտի 11-ից սկսվել է Հանրային հեռուստառադիոընկերության խորհրդի նախագահի թեկնածուների հայտերի ընդունումը: Խորհրդի նախագահի թեկնածուների թվում է Հ2 հեռուստաալիքի կոմերցիոն բաժնի տնօրեն Վլադիմիր Հայրապետյանը:
Վերջինս «Հայկական ժամանակ»-ի հետ զրույցում ասաց, որ նպատակահարմար չի գտնում, որպեսզի կենսագրությունը ներկայացնելիս իր անունը կապվի Հ2 հեռուստաալիքի հետ, քանի որ դա կապվում է Ռոբերտ Քոչարյանի անվան հետ. «Երբ լսում են, որ ես Հ2-ից եմ, մտածում են, որ քոչարյանական եմ, եւ ես նեղվում եմ»:
Վլադիմիր Հայրապետյանը վստահեցրեց, որ Հ2-ի կոմերցիոն բաժինը որեւէ ձեւով չի առնչվում քաղաքականության հետ. «Դա մի բաժին է, որը միայն գովազդներով է զբաղվում, 2000 թվականից հեռուստատեսության կոմերցիոն բաժնում եմ աշխատում, որն իմ առօրյա գործն է»:
Խոսելով Հանրային հեռուստառադիոընկերության խորհրդի նախագահի պաշտոնում իր թեկնածության մասին, Հայրապետյանն ասաց, որ հիմնական նպատակն է հասկանալ՝ կարո՞ղ է այդ ծանրությունն իր վրա վերցնել, թե՝ ո՛չ, եւ առաջին հերթին որոշակի ծրագրեր իրականացնի, որոնց մասին խոսելը, սակայն, վաղ համարեց:...
