«Հայաստանը եղել և մնում է Բելառուսի համար վստահելի գործընկեր, որի հետ մեզ միավորում է բազմաբևեռ համագործակցությունը, այդ թվում՝ առանցքային դաշինքներում՝ Եվրասիական տնտեսական միությունում և ՀԱՊԿ-ում», - հայտարարել է նախագահ Ալեքսանդր Լուկաշենկոն՝ ընդունելով Հայաստանի նորանշանակ դեսպանի՝ Արմեն Ղևոնդյանի հավատարմագրերը:
«Մենք մտադիր ենք զարգացնել հայ- բելառուսական առևտրատնտեսական հարաբերությունները, և պատրաստ ենք մասնակցել ցանկացած ծրագրի, այդ թվում՝ Հայաստանի տարածքում, որ կհետաքրքրի մեր հայ ընկերներին ու եղբայրներին», - ասել է Բելառուսի նախագահը:
Ղևոնդյանից բացի Լուկաշենկոն այսօր ընդունել է ևս մոտ մեկ տասնյակ նորանշանակ դեսպանների, հանդիսավոր արարողության ժամանակ հայտարարելով՝ Մինսկը պատրաստ է խորացնել կապերը աշխարհի հետ՝ «արևմուտքից մինչև արևելք, հյուսիսից մինչև հարավ», պայմանով, որ այդ համագործակցությունը հիմնված լինի հարգանքի, անկեղծության ու ազնվության վրա:
«Հաշվի առնելով Բելառուսի աշխարհաքաղաքական դիրքը՝ Մինսկը առավել քան որևէ մեկը շահագրգռված է խաղաղությամբ, կայունությամբ, ոչ կոնֆլիկտային ու արդյունավետ համագործակցությամբ: Միայն իրավահավասար երկխոսությամբ է հնարավոր վերացնել կարծրատիպերը և դրանց հիմքի վրա կառուցված՝ չհասկացվածության պատերը», - հայտարարել է Լուկաշենկոն:
Արևմուտքին ուղղված այս հայտարարությունը հնչել է Կրեմլի՝ շաբաթներ շարունակվող տնտեսական ճնշումներից հետո: Անցած տարեվերջից Մոսկվան բարձրացրել է Բելառուսին վաճառվող գազի գինն ու հարկային փոփոխություններ մտցրել, որոնց արդյունքում Մինսկը միլիոնավոր դոլարների վնաս է կրում: Առավել բարենպաստ պայմաններ սահմանելու, վնասը փոխհատուցելու դիմաց ռուսական կողմը պահանջում է խորացնել ինտեգրացիան, անցնել միասնական արժույթի, մաքսային ու հարկային քաղաքականության: Բելառուսում այս պահանջը դիտարկում են որպես ոտնձգություն երկրի անկախության ու ինքնիշխանության դեմ:
«Այս ճանապարհով գնալու դեպքում Ռուսաստանը կարող է կորցնել արևմտյան ուղղությամբ իր միակ դաշնակցին», - դեռ անցած շաբաթ զգուշացրել էր Բելառուսի առաջնորդը:
Այսօր նա Կանադայի, Չեխիայի, Ավստրիայի, Չեռնոգորիայի նորանշանակ դեսպանների ներկայությամբ հայտարարել է՝ Բելառուսում լուրջ բարեփոխումներ են իրականացվում, հատկապես՝ տնտեսությունն ազատականացնելու և ներդրումների համար բարենպաստ միջավայր ստեղծելու ուղղությամբ:
«Խորապես վստահ եմ, որ Մինսկը կարող է դառնալ նոր լայնամասշտաբ երկխոսության վայր՝ Եվրատլանտյան և Եվրասիական պետությունների անվտանգության հարցերով: Մենք այսուհետ ևս նախաձեռնելու ենք համագործակցության խաղաղասիրական ու միավորող ծրագրեր, և, իհարկե, կաջակցենք ձեր կողմից ցանկացած բար...
