«12 տարի է արդարություն չկա, Հրանտը չկա, հրաժարվել չկա». - այս ուղերձի ներքո հազարավոր մարդիկ այսօր Ստամբուլում հավաքվել էին «Ակօս»-ի նախկին խմբագրատան առջև՝ հիշելու 12 տարի առաջ թուրք ազգայնականի կրակոցներից սպանված պոլսահայ նշանավոր մտավորական, «Ակօս»-ի հիմնադիր խմբագրապետ Հրանտ Դինքին:
Թուրքական ոստիկանությունը լայնածավալ միջոցառումներ էր ձեռնարկել՝ ապահովելու հավաքի անվտանգությունը, փակվել էին խմբագրատուն տանող ավտոճանապարհները, հարակից մետրոյի կանգառը:
Այս տարի «Ակօս»-ի խմբագրատան պատշգամբից Դինքին նվիրված խոսքով հանդես եկավ 1948 թվականին ձերբակալված և անհետ կորած թուրք նշանավոր արձակագիր Սաբահադդին Ալիի դուստրը՝ Ֆիլիզ Ալին: «12-րդ անգամ հավաքվել ենք քո ձեռքերով հիմնած, մեծացրած «Ակօս»-ի շենքի առաջ, քեզ մեզնից խլած խավարի դեմ կանգնելու, քո և ընտանիքիդ կողքին լինելու համար», - ասաց նա:
Դինքի մահվան հերթական տարելիցի կապակցությամբ ուղերձ են հղել նաև շուրջ մեկ տարի կալանավորված թուրք հայտնի հասարակական գործիչ, «Անադոլու Քուլթուր» հասարակական կազմակերպության նախագահ Օսման Քավալան, Թուրքիայի լրագրողների միության նախագահ Թուրգայ Օլջայթոն:
Ինչպես ամեն տարի, այս...
