Հայաստանի ֆիլհարմոնիկը շարունակում է իր ակտիվ գործունեությունն առցանց հարթակում

Հայաստանի ազգային ֆիլհարմոնիկ նվագախումբն այս տարի նշում է հիմնադրման 95-ամյա հոբելյանը:

1925 թվականին նվագախումբը հիմնադրեցին մեր լավագույն երաժիշտներ Արշակ Ադամյանն ու Ալեքսանդր Սպենդիարյանը: Նվագախումբը տասնամյակներ շարունակ ղեկավարել են մեր լավագույն դիրիժորները: 2000 թվականից ի վեր` արդեն 20 տարի նվագախմբի գեղարվեստական ղեկավարն ու գլխավոր դիրիժորը Էդվարդ Թոփչյանն է: Նրա ղեկավարությամբ էլ Հայաստանի ազգային ֆիլհարմոնիկ նվագախումբն այս 20 տարիների ընթացքում ոչ միայն հանդես է եկել հյուրախաղերով աշխարհի տարբեր երկրներում, այլև մեծ դեր է խաղացել հենց Հայաստանում դասական երաժշտարվեստի զարգացման գործում: Այստեղ` Հայաստանում, նվագախմբի հետ հանդես են եկել արտասահմանյան լավագույն երաժիշտ կատարողներ, հրավիրյալ դիրիժորներ, և ոչ միայն դեռ 14 տարի առաջ Էդվարդ Թոփչյանի նախաձեռնած ամենամյա Երևանյան երաժշտական միջազգային փառատոնի շրջանակներում, այլև ողջ տարվա ընթացքում:

Իսկ արտակարդ դրության այս ժամանակահատվածում, նվագախմբի երկարամյա տնօրեն Ռուզաննա Սիրունյանի փոխանցմամբ, իրենք հանդես են եկել առցանց հարթակում` ներկայացնելով նվագախմբի լավագույն համերգային ծրագրերը, այդ թվում և «Ուրբաթօրյա ֆիլհարմոնիկ» ծրագիրը:

«Ազատության» հետ զրույցում Սիրունյանը նշեց նաև, որ աշնանը կայանալիք 14-րդ Երևանյան միջազգային երաժշտական փառատոնը շատ հետաքրքիր անակնկալներ է նախապատրաստել դասական երաժշտության մեր երկրպագուների համար, բայց գաղտնիքներ առայժմ չբացահայտեց. – «Ընդհանրապես պետք է ասեմ, որ վերջին ամիսներին, բնականաբար, համերգասրահը փակ լինելու պատճառով և ֆիլհարմոնիկ նվագախումբը ամբողջ կազմով փորձեր և համերգներ չունենալու պատճառով, բոլոր մշակութային օջախները անցել են առցանց հեռարձակումների: Սակայն պետք է ասեմ, որ դա մեզ համար շատ նորություն չէր, տարիներ շարունակ մենք շատ ակտիվ ենք եղել օնլայն հարթակում: Բնականաբար, 120 կամ 80 հոգով փորձեր չեն...