Մոսկվայում բողոքի ցույցերի վերջում ռուսաստանյան ոստիկանությունը կոշտ ուժ է կիրառել ցուցարարների նկատմամբ. ստիպում էին նրանց ցրվել, օգտագործում էին մահակներ, քաշքշում էին ցուցարարներին, այդ թվում՝ կանանց և անչափահասների:
Reuters-ի տվյալներով, Մոսկվայում բողոքի ակցիային մասնակցել է շուրջ 40 հազար մարդ, ռուսաստանյան ոստիկանության տվյալներով՝ ընդամենը 4000:
Բազմամարդ էին բողոքի ակցիաները նաև Սանկտ Պետերբուրգում: Չնայած ոստիկանությունը ամեն կերպ փորձում էր արգելել, Նևսկի պողոտան լեփ-լեցուն էր: Բզմամարդ էին ցույցերը Սիբիրի քաղաքներում, մասնավորապես, Նովոսիբիրսկում, Կրասնոյարսկում, Իրկուտսկում, մարդաշատ էին ակցիաները նաև Եկատերինբուրգում, որտեղ մարդիկ, չնայած շատ ցուրտ եղանակին, դուրս էին եկել փողոց ի աջակցություն ընդդիմադիր գործիչ Ալեքսեյ Նավալնիի:
Ի դեպ, Մոսկվայում բողոքի ակցիային մասնակցել էին նաև Նավալնիի մայրը և կինը: Կնոջը ձերբակալել են, ինչպես նաև ավելի վաղ ձերբակալել էին Նավալիի մտերիմ և ակտիվ աջակիցներին: Այսօրվա ակցիան, օրինակ, Մոսկվայում առաջնորդներ չուներ, ելույթներ չէին հնչում, նախօրոք գրված ծրագիր էլ չկար: Կրեմլ տանող բոլոր փողոցները փակ էին, ինչպես նաև փակ էին Կրեմլի հարևանությամբ մետրոյի կայանների մուտքերը:
Ընդհանուր առմամբ ոստիկանությունն այսօր, նախնական տվյալներով, ձերբակալել է 1300-ից ավելի մարդ, Մոսկվայում 400-ից ավելի մարդ է ձերբակալվել:
Մարդիկ այսօր դուրս էին եկել փողոց՝ պահանջելով ազատ արձակել Նավալնիին, ով թունավորումից հետո հինգ ամիս Գերմանիայում բուժում սանալուց հետո՝ հունվարի 17-ին Մոսկվա վերադառնալուն պես օդանավակայանում ձերբակալվել է:
Հաջորդ օրը մերձմոսկովյան Խիմկի քաղաքում տեղի ունեցած դատավարությանը նրան կալանավորել են 30 օրով: Փետրվարի 2-ին պետք է կայան նոր դատավարություն՝ «Իվ Ռոշե»-ի գործով: Մեղադրող կողմը պահանջելու է 3,5 տարվա իրական ազատազրկում Նավալնիի համար՝ պայմանականի փոխարեն:
Ալեքսեյ Նավալնիի նկատմամբ բացված են նաև այլ քրեական գործեր ևս...
