Անկարան վերջին զգուշացումն է անում Դամասկոսին՝ Իդլիբում ռազմական գործողությունների մեկնարկը ժամանակի հարց է: Այդ մասին այսօր հայտարարել է Թուրքիայի նախագահ Ռեջեփ Էրդողանը՝ ընդգծելով, որ մտադիր չեն հրաժարվել սիրիական այդ նահանգից, ավելին, կոչ է անում սիրիական իշխանություններին դուրս բերել զորքը:
«Բաշար Ասադի ռեժիմը պետք է դադարեցնի ագրեսիվ գործողությունները և հեռանա ապառազմականացված գոտուց», - հայտարարել է Էրդողանը՝ հակառակ դեպքում սպառնացել ռազմական գործողություններով ստիպել դա անել:
Թուրքիայից հերթական սպառնալից հայտարարությունները հնչում են Իդլիբի հարցով թուրք-ռուսական մեկը մյուսին հաջորդած բանակցությունների տապալումից հետո:
Տարբեր ճամբարներում հայտնված բարեկամներին չի հաջողվում համաձայնության հասնել Իդլիբի շուրջ, երկու կողմն էլ փորձում է իրականացնել սիրիական զինված ընդդիմության ձեռքում մնացած վերջին տարածքը մաքրելու սեփական պլանը. Մոսկվան՝ ռազմական աջակցություն ցուցաբերելով Ասադին, Անկարան՝ Ասադին ընդդիմացող զինված խմբավորումներին:
Տևական ժամանակ, այդուհանդերձ, Թուրքիային և Ռուսաստանին հաջողվում էր փոխհամաձայնեցված քաղաքականություն վարել: Շահերը, սակայն, հատվեցին Թուրքիայի սահմանից 25 կմ հեռավորության վրա գտնվող Իդլիբում, որտեղ 2018-ին Մոսկվան և Անկարան համաձայնել էին հրադադար հաստատել ու անվտանգության գոտի ստեղծել:
Շաբաթներ առաջ Ասադի զորքերը՝ ռուսական օդուժի առաջնորդությամբ, սկսեցին հրթիռակոծել ու առաջ գնալ՝ ընդդիմության վերջին հենակետը գրավելու համար։ Որոշ հաջողությունների շնորհիվ սիրիական կառավարական բանակը արդեն վերականգնել է հսկողությունը Հալեպը մայրաքաղաք Դամասկոսին կապող մայրուղու նկատմամբ:
Սիրիական բանակի առաջխաղացման ֆոնին Անկարայից հնչող սպառնալիքներին Ռուսաստանը հիմնականում մեղմ է արձագանքում, քանի որ Սիրիայում Թուրքիայի հնարավորությունները սահմանափակ են։ Մեկնաբանները նշում են, որ գրեթե անհնար է պատկերացնել, թե ինչպես է ցամաքի վրա թուրքական զորքը փորձելու պատժել Ասադի բանակին, որին վերևից Մոսկվան, ցամաքի վրա էլ՝ Թեհրանն է աջակցում: Ընդ որում՝ Ռուսաստանը լիովին թագավորում է սիրիական օդային տարածքը շնորհիվ S400-ների, որն այնքան էր Էրդողանի վարչակազմին հրապուրել և տպավորել, որ ի հեճուկս ՆԱՏՕ-ի սպառազինության հետ անհամատեղելիության, գնել էր Ռուսաստանից:
Այսօր արձագանքելով Ռեջեփ Էրդողանի հայտ...
