Ամբողջ աշխարհում թոքերի օդափոխության սարքերի, ռեսպիրատոների, բժշկական դիմակների, դեմքը պաշտպանող թափանցիկ վահանների, ռետինե ձեռնոցների, ախտահանիչ նյութերի և կորոնավիրուսի դեմ պայքարում անհրաժեշտ այլ պարագաների մեծ դեֆիցիտ է:
Այս աստիճանի լայնածավալ համավարակին հակազդելուն պատրաստ չէին նաև գերզարգացած պետությունները, և հիմա մարդիկ փորձում են հարմարվել ու արտակարգ պայմաններում ստեղծել բացակայող իրերը:
Ընդ որում, պաշտպանության կարիք ունեն նախևառաջ նրանք, ովքեր վիրուսի դեմ կռվի առաջնագծում են՝ բժիշկները:
Չեխիայում մի խումբ հետազոտողներ, գյուտարարներ և տեխնոլոգներ բժիշկների համար ստեղծում են ռեսպիրատորներ... ջրասուզակների դիմակներից:
Ոչինչ, որ անվանի ընկերության պիտակով արտադրանք չէ, եթե չկա գործարանային արտադրանքի ռեսպիրատոր, իսկ հիվանդին պետք է հենց այս պահին մոտենալ, թող գոնե այսպես պաշտպանվեն բժիշկը, բուժակը, բուժքույրն ու հիվանդանոցի մնացած աշխատողները:
Պրահայի Ճարտարագիտական համալսարանի մասնագետները և նրանց սատարող մի խումբ ակտիվիստներ ծովային մարզաձևերի սիրահարների համար արտադրվող ջրասուզակի դիմակից պատրաստել են ռեսպիրատոր, որն իր որակով նույնիսկ գերազանցել է FFP3 հապավումով հայտնի ռեսպիրատորը, որը գործնականում այս օրերին չափազանց դժվար է հայթայթել:
«Այս ռեսպիրատորը փակում է ամբողջ դեմքը և պաշտպանում է շնչառական համակարգը, մարդը շնչում է մրի մասնիկներ արգելափակող P3R ֆիլտրով», - ասել է նախագծի հեղինակ Դավիդ Միկլաշը:
«Ինֆեկցիոն հիվանդությունների բաժանմունքում շատ ոգևորված...
