Ֆրանսիայի նախագահ Էմանուել Մակրոնը երեկ այցելել է «Հայաստան» հիմնադրամի ֆրանսիական մասնաճյուղի կենտրոնակայան, որտեղ այս օրերին ընթանում է ամենամյա դրամահավաք-հեռախոսամարաթոնը։ Այս տարի միջոցառումը նվիրված է Արցախյան պատերազմի արդյունքում տեղահանված եւ ունեզրկված հազարավոր արցախահայության կարիքներին։
Մակրոնը եւս հայտարարել է, որ Ֆրանսիան մարդասիրական օգնություն կուղարկի. առաջին ինքնաթիռը կհասնի նոյեմբերի 22-ին, երկրորդը՝ նոյեմբերի 27-ին, ուղեկցողը կլինի ֆրանսահայ ճանաչված ֆուտբոլիստ Յուրի Ջորկաեֆը։
Ֆրանսիայի նախագահն ավելի վաղ թվիթերյան իր էջում գրառում էր կատարել՝ նշելով.«Ֆրանսիան ՅՈՒՆԵՍԿՕ-ի շրջանակում եւ Հակամարտություններում ժառանգության պաշտպանության դաշինքի հետ՝ պատրաստ է ներդնել իր փորձը եւ լիակատար աջակցություն ցուցաբերել Լեռնային Ղարաբաղի եւ նրա շրջակայքի մշակութային եւ կրոնական ժառանգության պաշտպանության գործում»։
Արցախի վիճահարույց տարածքների հարցի շուրջ Հայաստանի եւ Ադրբեջանի միջեւ հակամարտությունում 2020թ.-ի նոյեմբերի 10-ին հաստատված հրադադարից հետո մեծացել են մտահոգությունները հայերի կորցրած տարածքներում գտնվող նրանց հազարամյա մշակութային ժառանգության պահպանման հետ կապված:
ՅՈՒՆԵՍԿՕ-ն առաջարկել է փորձագիտական առաքելություն ուղարկել Լեռնային Ղարաբաղ «շահագրգիռ կողմերի համաձայնությամբ»՝ տարածաշրջանի մշակութային արժեքները հաշվառելու համար. երեկ այս մասին հայտարարել է ՄԱԿ-ի Փարիզում տեղակայված կրթական, գիտական եւ մշակութային կազմակերպությունը. այս մասին հայտնում է «Ֆրանս Ինֆո» ռադիոհեռուստակայանը՝ հղում անելով ֆրանսիական «Ֆրանսպրես» (AFP) լրատվական գործակալությանը։
Հայաստանի եւ Ադրբեջանի ներկայացուցիչների հետ հանդիպումների ընթացքում կառույցի գլխավոր տնօրեն Օդրի Ազուլեն առաջարկել է «ՅՈՒՆԵՍԿՕ-ի ծառայությունների տեխնիկական աջակցությունը՝ հնարավոր առաքելությունը նախապատրաստելու համար, որով կիրականացվի ամենակարեւոր մշակութային շինությունների նախնական գույքագրումը՝ որպես տարածաշրջանի ժառանգության արդյունավետ պաշտպանության նախապայման»:
Իր զրուցակիցների հետ Օդրի Ազուլեն «վերահաստատել է մշակութային ժառանգության համընդհանուր արժեքը, պատմության ականատեսն ու ժողովուրդների ինքնությունից անբաժան լինելը, ինչն էլ միջազգային հանրությունը պարտավոր է պաշտպանել»՝ փոխանցում է «Ֆրանս Ինֆո»-ն՝ ՅՈՒՆԵՍԿՕ-ի հայտարարությունը զգուշավոր համարելով եւ ընդծելով, որ այն տեսանելիորեն զերծ է մնում տարածաշրջանում հայ...
