Ադրբեջանի իշխող կուսակցությունը, որը Արևմուտքին պարբերաբար մեղադրում է ադրբեջանական ընդդիմությանը ֆինանսավորելու մեջ՝ իշխանությունը տապալելու նպատակով, խոստովանում է, որ ինքն է ֆինանսավորում ընդդիմությանը:
Իլհամ Ալիևի գլխավորած «Ենի Ազերբայջան» կուսակցության որոշ պատգամավորներ այս օրերին հանդես են գալիս հայտարարություններով՝ պատմելով, որ ընդդիմադիրների են «գնել», սակայն չհստակեցնելով նման պնդումների նպատակը:
Այդ մասին նախ հայտարարել է իշխող ուժի առաջատար անդամներից Սիյավուշ Նովրուզովը: «Մենք հստակ ցուցակներ ունենք», - վստահեցրել է իշխող խմբակցության պատգամավորը՝ առանց անուններ հնչեցնելու:
Ուշագրավ է, որ Նովրուզովի այս հայտարարությունը հրապարակել են մի շարք իշխանամետ լրատվամիջոցներ, սակայն իշխող կուսակցության պաշտոնական կայքէջում նրա ելույթը չի տեղադրվել:
Սիյավուշ Նովրուզովի հայտարարությանը հաջորդել է նրա կուսակից պատգամավոր Էլդար Իբրահիմովի հայտարարությունը: Իշխանական այս պատգամավորը նույնպես հաստատել է՝ «գնել են» ընդդիմադիրների, սակայն նրանցից շատերը այդպես էլ չեն ծառայել պետական շահերին:
«Ոմանք անցել են մեր կողմը հանուն փողի և մանդատի, բայց պետք է ասեմ, որ թշնամին չի կարող ընկեր դառնալ, եթե թշնամին ներս է մտնում, միևնույն է՝ մի օր նա իր թշնամանքը ցույց կտա: Այնպես որ, մեզ նման ընկերություն պետք չէ», - հայտարարել է Իբրահիմովը, որն իշխող ուժի հիմնադիրներից է:
Նախագահ Ալիևի կուսակիցների այս հայտարարությունները բուռն արձագանք են գտել երկրում, նշում է «Թուրան» լրատվական գործակալությունը և հավելում, որ մարդիկ փորձում են կռահել, թե հատկապես ում մասին են խոսում իշխանությունները:
Ադրբեջանի նախագահի օգնական Ալի Հասանովը շտապել է հայտարարել, որ իշխող կուսակցության պատգամավորների պնդումները ընդամենը նրանց սեփական տեսակետն է և որևէ կերպ չեն արտացոլում «Ենի Ազերբայջան»-ի պաշտոնական տեսակետը:
Ընդդիմադիրներին «գնելու» մասին պնդումը Հ...