«Իմ քայլը» խմբակցության պատգամավոր Վահագն Հովակիմյանը Պետաիրավական հանձնաժողովում քննարկման է ներկայացնելու նախագիծ, որը հնարավորություն կտա արտակարգ դրության ավարտից հետո չեղարկել Սահմանադրական դատարանի (ՍԴ) նախագահ Հրայր Թովմասյանի և 6 անդամների լիազորությունների դադարեցում ենթադրող հանրաքվեն:
«Ռազմական դրության կամ արտակարգ դրության ժամանակ, եթե մինչ այդ հանրաքվե է եղել նշանակված, ըստ էության, խորհրդարանը հնարավորություն է ունենում ռազմական կամ արտակարգ դրության ընթացքում իր որոշումը ուժը կորցրած ճանաչելու: Սա ինքնին բխում է Սահմանադրության պահանջներից, որովհետև Սահմանադրությամբ խորհրդարանը կարող է որոշումներ կայացնել: Այդ որոշումները, ինչպես ինքը կայացնում է, այնպես էլ կարող է ուժը կորցրած ճանաչել», - ասաց Հովակիմյանը:
Դեռ մարտի 31-ին պատգամավորը շրջանառության մեջ էր դրել նախագիծ, որը կարգավորումներ էր սահմանում արտակարգ դրության ավարտին հանրաքվեն կազմակերպելու գործընթացում: Քանի որ, ինչպես Հովակիմյանն է պնդում, հանրաքվեի մասին սահմանադրական օրենքում բաց կա։ Սահմանված է միայն, որ արտակարգ դրության ավարտից հետո նախագահը երեք օրվա ընթացքում հանրաքվեի նոր օր է նշանակում՝ ոչ շուտ քան 50, ոչ ուշ քան 65 օրվա ընթացքում, բայց թե ինչպես է դա արվելու, օրենքում չկա:
«Ուղղակի ժամանակին, որ գրվել է օրենքը, իմ տպավորությամբ, ուղղակի չեն պատկերացնում, որ հնարավոր է նման իրավիճակ լինի, ուղղակի չեն պատկերացրել: Նման իրավիճակը իրենց ֆանտաստիկ կնոյից է երևի թվացել», - նշեց պատգամավորը:
Նախագիծը կառավարության գործընկերների հետ քննարկելուց հետո Հովակիմյանը այն լրամշակել է և շրջանառության մեջ կդնի փաթեթ, որտեղ փոփոխություններ են նախատեսվում նաև ԱԺ կանոնակարգ օրենքում և ՍԴ մասին օրենքում: Առանց այդ փոփոխությունների գործող օրենսդրությունը որևէ հնարավորություն չի տալիս չեղարկելու արդեն նշանակված հանրաքվեն։
«Չեղարկումը նույն ընթացակարգով պետք է լինի, ինչպես որոշման ընդունումը, որովհետև այստեղ նորմատիվ իրավական ակտերի մասին օրենքը հստակ է՝ ասում է՝ իրավաստեղծ է: Այսինքն՝ այս դեպքում նախաձեռնության հեղինակները եղե՞լ են առնվազն մեկ քառորդը պատգամավորները, ուրեմն էդ մեկ քառորդը պետք է մի հատ էլ հակառակ որոշում կարողանա նախաձեռնի», - ասաց Վահագն Հովակիմյանը:
Հանրաքվե չիրականացնելու մտադրության մասին իշխանությունները խոսել էին նաև ավելի վաղ՝ հիմնավորմամբ, թե կորոնավիրուսի համաճարակը դեռ երկար ժամանակ չի անցնի, իսկ Սահմանադրական ճգնաժամը պետք է հանգուցալուծել հնարավորինս արագ։
Հանրաքվեն չեղարկելուց հետո ի՞նչ ճանապարհով են շարունակելու սահմանադրական փոփոխությունները, հանրաքվեի դնելու որոշման նախագծի հեղինակ Վահագն Հովակիմյանը դեռ վաղ է համարում ասելը: Հորդորում է սպասել Վենետիկի հանձնաժողովի եզրակացությանը, որին խորհրդատվության համար դիմել են Հայաստանի իշխանությունները։
«Առաջարկի էությունը ճգնաժամի լուծման, որպեսզի Սահմանադրական դատարանի ներկայիս կազմը դարձվի համահունչ Սահմանադրության 7-րդ գլխին: Այլ կերպ ասած՝ այնտեղ լինեն բացառապես անդամներ և դատավորներ...