Ազգային ժողովն այսօր առաջին ընթերցմամբ ընդունեց ճանապարհային երթևեկության կանոնակարգման բալային համակարգի ներդրման օրինագիծը:
«Վարչական իրավախախտումների վերաբերյալ օրենսգրքում փոփոխություններ և լրացումներ կատարելու մասին» և կից ներկայացված օրենքների նախագծերի փաթեթը մշակել է կառավարությունը: Սրանով նախատեսվում է տրանսպորտային միջոցներ վարելու իրավունք ունեցող անձին վարորդական վկայական ստանալու օրվանից մեկ տարի ժամկետով տրամադրել 9 միավոր:
Խախտում ամրագրելու դեպքում վարչական իրավախախտում կատարած անձին տվյալ տարում տրված ընդհանուր միավորներից ինքնաշխատ եղանակով հանվում են օրենսգրքի համապատասխան հոդվածով նախատեսված իրավախախտման համար սահմանված տուգանային միավորները: Երթևեկության ոլորտի 100 զանցակազմերից այս պահին տուգանային միավորներ նախատեսված են շուրջ 20-ի համար։
«Վարորդի ընկեր» հասարակական կազմակերպության համահիմնադիր Սերգեյ Ղահրամանյանը նկատում է, որ վերջին տասնամյակում սա երթևեկության կանոնների մեջ նկատելի բարեփոխում է․ - «Տուգանելու մեխանիզմից անցում է կատարվում դեպի հնարավորինս կանխարգելիչ [մեխանիզմի], ինչպես նաև [ձևավորվում է] վերահսկելի երթևեկության մթնոլորտ: Որովհետև ներկայումս կան խախտողներ, որոնք ամեն օր կարող են արագաչափերի տակ բարձր արագությամբ անցնել, ամեն օր կարող են ալկոհոլ օգտագործած վարել և, գումարը վճարելով, կարող են շարունակել: Այս համակարգի ամբողջ էությունը կայանում է նրանում, որ այլևս ուղղակի գումար տալով չես կարող խուսափել պատժից: Այն խախտումներն են բալավորվել, որոնք առավել վտանգավոր են, որոնց հետևանքով վթարներ են տեղի ունենում, զոհերով և վիրավորներով ճանապարհատրանսպորտային պատահարներ: Դրանք են՝ խմածությունը, բարձր արագությունը, այնուհետև, ըստ դրա, քիչ-քիչ իջնում են»:
Դա, նրա խոսքով, վարորդներին ավելի զգոն կդարձնի․ - «Այս ամենի իմաստը ոչ թե վարորդին տուգանելն է, այլ կյանքին վտանգ սպառնացող երևույթները կանխելը»:
Ոստիկանության պետի տեղակալ Հովհաննես Քոչարյանը երեկ Ազգային ժողովում օրինագծի քննարկման ընթացքում ասաց, որ 2012-ից սկսած ճանապարհատրանսպորտային պատահարների հետևանքով գրանցված զոհերի և վիրավորների թիվն աճի կայուն միտումներ ունի։ 2018-ի վեց ամսվա տվյալներով, ճանապարհատրանսպորտային պատահարների թիվը 1711 է, մահերին՝ 138, վիրավորներինը՝ 2517։ 2019-ի նույն ժամանակահատվածում՝ պատահարների թիվը հասել է 2088-ի, մահերինը՝ 150-ի, վիրավորների...