Անցած երեք տարիների իրադարձությունները հուշում են, որ Հայաստանում մարդու իրավունքների դաշտում լուրջ պատերազմ է սպասվում: Այս մասին այսօր «Իշխանության ճյուղերի տարանջատումը խորհրդարանական համակարգում» թեմայով քննարկման ժամանակ ասաց Գյումրիի ժուռնալիստների «Ասպարեզ» ակումբի նախագահ Լևոն Բարսեղյանը: Եվ այս ամենը, նրա խոսքով, համընկավ Հայաստանը Եվրասիական տնտեսական միություն մտցնելու հետ: Բարսեղյանը վերհիշեց վերջին տարիներին մարդու իրավունքների խախտման դեպքերը: «Էլեկտրիկ Երևան» ակցիայի ու «Սասնա ծռերի» զինված ապստամբության օրերին, նրա խոսքով, կազմակերպված հանցագործություն տեղի ունեցավ լրագրողների ու քաղաքացիների նկատմամբ: «Հաշվեցինք, մոտ 80-90 հոգի պետք է դատապարտված լինեին լրագրողների նկատմամբ գործողությունների համար, այդ թվում՝ բարձրաստիճան ոստիկանական պաշտոնյաներ: Այնինչ, դատապարտվածների թիվը մեկ տասնյակի էլ չի հասնում, նրանցից մի քանիսը ոստիկաններ են, և ընդամենը տուգանքներով են պրծել»,- ասաց նա: Ըստ Բարսեղյանի՝ արտահայտման ազատության տեսանկյունից վերոնշյալ ակցիաների ժամանակ սահմանափակվել է մոտ 1200 մարդու իրավունք, նրանք խաղաղ ակցիաներ էին անում, բայց հետապնդվել ու տարվել են ոստիկանական բաժանմունքներ: Լևոն Բարսեղյանի խոսքով՝ Հայաստանում բազմակարծության նկատմամբ ատելության միջավայրը խորացել է: Ընդհանրապես բազմակարծությունը Հայաստանի իշխանությունների համար անընդունելի է, բայց, նրա խոսքով, վերջին տարիներին մենք ունենք ուղիղ սպառնալիքներ իրավապաշտպանների, լրագրողների, խմբագիրների, փաստաբանների նկատմամբ, բայց պ...