PanARMENIAN.Net - Եթե Ադրբեջանն ասում է, որ Ղարաբաղը պետք է լինի Ադրբեջանի կազմում և ադրբեջանական կողմի այս սկզբունքը կատեգորիկ է ու կոմպրոմիս չճանաչող, ուստի Հայաստանն էլ պետք է ասի` Արցախը Հայաստանն է և վերջ։ Վանաձորում ասուլիսի ընթացքում այս մասին հայտնել է վարչապետ Նիկոլ Փաշինյանը.
«Խնդիրն այն է, որ Ադրբեջանն անընդհատ հայտարարում է, թե ղարաբաղյան հարցը մեկ սկզբունքով կլուծվի` Ադրբեջանի տարածքային ամբողջականության շրջանակներում։ Սակայն ԵԱՀԿ Մինսկի խմբի համանախագահների հետ աշխատանքային քննարկումների ընթացքում ասվել է, որ Ղարաբաղի կարգավիճակը կարող է լինել տարբեր, ընդհուպ` Ադրբեջանի կազմից դուրս»։
Վարչապետը ևս մեկ անգամ նշել է, որ Ղարաբաղի հարցի ցանկացած լուծում պետք է ընդունելի լինի Հայաստանի, Արցախի ու Ադրբեջանի ժողովուրդների համար, հիշեցնելով նաև՝ ինքը Հայաստանի առաջին ղեկավարն է եղել, որը խոսել է Ադրբեջանի ժողովրդի կողմից ինչ-որ ընդունելի լուծման մասին և քննադատվել դրա համար: