Առնվազն վեց զոհ, հարյուրավոր վիրավորներ, շուրջ հազար ձերբակալված ցուցարար. սրանք են վերջին օրերին Իրանում ծավալված բողոքի ակցիաների և դրանք ուղեկցող բախումների հետևանքները ըստ պաշտոնական Թեհրանի: Մի շարք այլ տեղեկությունների համաձայն զոհերի թիվն անհամեմատ ավելի մեծ է` այն տատանվում է 150-ից 200-ի միջակայքում:
Անկախ աղբյուրներից, սակայն, այս տեղեկությունները հաստատել հնարավոր չէ, քանի որ արդեն երրորդ օրն է ինչ համացանցը Իրանի տարածքում գրեթե ամբողջությամբ արգելափակված է, իրանցի շուրջ 57 միլիոն օգտատերերը զուրկ են արտաքին աշխարհի հետ շփվելու հնարավորությունից: Իրանում ծավալված իրադարձությունների մասին որոշակի կցկտուր պատկերացումներ կարելի է կազմել միայն սոցիալական ցանցերում, հիմնական Twitter-ում հայտնվող տեսագրություններից, որոնցից պարզ է դառնում, որ բենզինի կտրուկ թանկացման դեմ բողոքի ցույցերը իրանցի ուժայինները փորձում են ճնշել ամենադաժան մեթոդներով` նաև հրազենի կիրառմամբ:
Հանգստյան օրերին Թեհրանում արված տեսագրության մեջ, օրինակ, հստակ երևում է, որ ոստիկանները կրակ են բացում փողոցն արգելափակած ցուցարարների ուղղությամբ:
«Ազատության» իրանական ծառայության կայքում ևս մեկ սիրողական տեսագրություն է զետեղված, որը պատկերում է Իրանի արևմուտքում գտնվող Ջավանրուդ քաղաքում ծավալված իրադարձությունները: Այս տեսագրության մեջ երևում է, թե ինչպես են բնակելի շենքերից մեկի կտուրին դիրքավորված ուժայինները կրակ բացում բողոքի ցույցի մասնակիցների ուղղությամբ:
Իրանի ուժային կառույցների նման կոշտ արձագանքի գլխավոր պատճառներից մեկը բողոքի ակցիաների գրեթե ակնթարթային քաղաքականացումն էր: Բենզինի թանկացման դեմ կարգախոսներին արագորեն փոխարինելու եկան Իրանի ղեկավարների հրաժարականի և կառավարման համակարգը փոխելու պահանջները:
«Կորչի՛ բռնապետը»` այս վանկարկումները նախօրեին հնչում էին Թեհրանի համալսարանում: Դատելով անկախ աղբյուրներից ստացվող տեղեկություններից՝ Իրանում ծավալված ցույցերի շարժիչ ուժը հենց ուսանողությունն է: Դա է թերևս պատճառը, որ նոյեմբերի 18-ի դրությամբ Իրանի հինգ խոշորագույն համալսարանները և 17 քաղաքներում գործող դպրոցները փակ էին:
Այս օրերին պաշտոնական Թեհրանը բախվում է ոչ միայն ներքին, այլև արտաքին ճնշման: Ինչպես և կարելի էր ենթադրել, առաջինը Իրանի իշխանությունների հասցեին կոշտ քննադատությամբ հանդես եկավ Վաշինգտոնը:
«Մենք խստորեն դատապարտում ենք այս վարչակա...