Հանրապետական կուսակցությունը իր այսօրվա հայտարարությամբ դեկտեմբերի 9-ի խորհրդարանական ընտրությունները որակել է ժողովրդավարական իրենց ձևով, բայց ոչ բովանդակությամբ։
«Դրանք անցան այլախոհության նկատմամբ անհանդուրժողականության, թեկնածուների և նրանց աջակիցների, ՏԻՄ ղեկավարների նկատմամբ բիրտ ճնշումների և այլատյացության քարոզի պայմաններում, վարչական ռեսուրսի աննախադեպ կիրառմամբ: Կառավարման խորհրդարանական համակարգի անցման հիմնական նպատակներից մեկը հենց տարբեր, անգամ հակադիր կարծիքների համադրման հնարավորության ստեղծումն է։ Հետևաբար ցավալի է, որ ընտրարշավն այդքան խոր բաժանարար գծեր ստեղծեց»,- ասված է ՀՀԿ նախընտրական շտաբի այսօր տարածած հայտարարության տեքստում:
Նույնիսկ անզեն աչքով տեսանելի է, որ ՀՀԿ հայտարարության վերջին հատվածն աչքի է ընկնում շեշտված ռացիոնալ ձևակերպումներով՝ կարծես ցրելով տպավորությունը, որ այս կուսակցությունը խորհրդարանական վերջին կամպանիայի հակամարտ կողմերից մեկն էր։
ՀՀԿ շտաբը հաջողություն է մաղթել խորհրդարան անցած ուժերին և նրանց ձևավորելիք կառավարությանը՝ նշելով, որ դրանից է կախված երկրի և ժողովրդի անվտանգությունն ու զարգացման հեռանկարը:
Հանրապետական կուսակցության շտաբը նշել է, որ ներքին քաղաքական այս թեժ մրցակցությունը չպետք է ոգևորի Հայաստանի և Արցախի թշնամիներին։ «Անկախ միջկուսակցական պայքարում բոլոր տարաձայնություններից` Հանրապետականը հանձնառու է մնում մաս լինելու մեր ժողովրդի խնդիրների լուծմանը և շարունակելու է ամուր կանգնել մեր փառապանծ Զինված ուժերի կողքին»,- նշել են հանրապետականները։
Ավարտված խորհրդարանական ընտրություններում ՀՀԿ-ն հայտնվել է ամենաինտրիգային իրավիճակում․ Սերժ Սարգսյանի կուսակցությանը չհերիքեց ընդամենը չորս հազար ձայն՝ խորհրդարան անցնելու համար, ու շատերը կարծում էին, որ հետընտրական փուլում կշարունակվի քարոզարշավի տրամաբանությունը, և ՀՀԿ-ն իրավական հարթության վրա ու իր քաղաքական հայտարարություններով մինչև վերջ կշարունակի վիճարկել ընտրությունների արդյունքները։
Սակայն ՀՀԿ-ն ընտրեց միանգամայն այլ մարտավարություն՝ տարածած հայտարարությամբ փաստացի ընդունելով ընտրությու...