Այսօր առաջին ատյանում կվերսկսվի Հայաստանի երկրորդ նախագահ Ռոբերտ Քոչարյանի և մյուս նախկին բարձրաստիճան պաշտոնյաների գործով դատաքննությունը: Երևանի ընդհանուր իրավասության դատարանի դատավոր Դավիթ Գրիգորյանի լիազորությունների կասեցումից հետո գործը մակագրվել է դատավոր Աննա Դանիբեկյանին:
Սահմանադրական դատարանը անցած շաբաթ հրապարակեց Մարտի 1-ի գործով առանցքային մեղադրյալ Ռոբերտ Քոչարյանի դիմումի քննության արդյունքում կայացված որոշումը, որը տարընթերցումների տեղիք տվեց․ ոմանք գտնում են, որ որոշումից հետո նախկին նախագահը պետք է ազատ արձակվի, և քրեական գործը պետք է դադարեցվի նրա նկատմամբ, մյուսներն էլ պնդում են, որ որոշումը չի ազդում խափանման միջոցի վրա:
Ռոբերտ Քոչարյանի խափանման միջոցի հարցը դատարանն այսօր պետք է քննի հենց նիստի մեկնարկին, «Ազատության» հետ զրույցում պնդեց նախկին նախագահի փաստաբան Հովհաննես Խուդոյանը՝ նշելով, որ նաև դատարանն է այդպիսի արձանագրում արել: «Մի քանի ընթացակարգային հարցեր սպառելուց հետո՝ շատ կարճ տևողությամբ , պրոցեսուալ, բովանդակային բան չկա մեջը, առաջնահերթ այդ միջնորդությունը պետք է քննվի՝ այդպես է մեր օրենքի պահանջը՝ Քրեական դատավարության օրենսգրքի, ու նաև այդպես է աձանագրել տիկին Դանիբեկյանը իր դատական ակտով գործը դատաքննության նշանակելով, որի մեջ նշվել է, որ խափանման միջոցի հարցին առաջնահերթ անդրադառնալու է», - ասաց Խուդոյանը:
Սահմանադրական դատարանի որոշումից հետո Քոչարյանի փաստաբանական թիմը դատավոր Դանիբեկյանին միջնորդություններ ներկայացրեց՝ անհապաղ վերացնել մեղադրյալի կալանքը և քրեական հետապնդումն էլ դադարեցնել։ Ավելին, պաշտպանները դատարանի նախագահին ուղղված գրությամբ խնդրել էին ապահովել, որ միջնորդությունները քննության առնվեն անհապաղ՝ չսպասելով այսօրվա նիստին, ինչը, սակայն տեղի չունեցավ:
Ռոբերտ Քոչարյանի աջակիցներից բացի՝ այսօր դատարանի առջև են հավաքվելու նաև արդար դատաքննություն պահանջող ցուցարարներ, իրավապաշտպաններ: Ակցիան նախաձեռնած «Լրագրողներ հանուն մարդու իրավունքների» հասարակական կազմակերպության նախագահ, իրավապաշտպան Ժաննա Ալեքսանյանն ասում է՝ անցած ամիսներին Քոչարյանի պաշտպանների ներկայացրած միջնորդությունները ստվերել են բուն գործը, կատարված հանցագործությունը:
«Այս ընթացքում այդ գործը գոյություն չունի՝ Մարտի 1-ը, այդ ահաբեկչությունը, այսպես ասած, հանրության նկատմամբ, որին ես ներկա եմ եղել շատ դրվագներով, այդ սարսափելի, ողբերգական դեպքերը ուզում են մոռացության տան երևի Քոչարյանի համար անընդհատ միջնորդություններ անել...