Նոր կորոնավիրուսով վարակվածներթի թիվն աշխարհում գերազանցել է 12 միլիոնի շեմը, մահացել է ավելի քան 550 հազար մարդ, ապաքինվել է ավելի քան 7 միլիոն հիվանդ։
Վարակի տարածման և մահացության ցուցանիշով առաջին տեղում Միացյալ Նահանգներն է, որտեղ, ըստ Johns Hopkins-ի համալսարանի հրապարակած ամփոփագրի, հիվանդների թիվն անցել է 3 միլիոնը, մահացել է մոտ 132 հազար մարդ։
Առավել տուժած նահանգը Նյու Յորքն է՝ ավելի քան 400 հազար ախտահարում և ավելի քան 32 հազար զոհ։
100 հազարից ավելի ախտահարումներ են Կալիֆորնիայում, Ֆլորիդայում, Տեխասում, Նյու Ջերզիում, Իլինոյսում, Մասաչուսեթսում, Արիզոնայում և Ջորջիայում։
Ամերիկյան հիվանդանոցների վիճակի, կտրուկ աճ գրանցած գործազրկության և վիրուսի դեմ պայքարի հետ կապված տնտեսական ու սոցիալական այլ հարցերի շարքում աստիճանաբար հրատապ է դառնում նաև նոր ուսումնական տարվա թեման։
Արդյո՞ք անվտանգ է դպրոցների աշխատանքի վերսկսումը։ Այս նոր պայմաններում ի՞նչ միջոցներ են անհրաժեշտ ուսուցիչների և աշակերտների առողջությունն ապահովելկու համար։
ԱՄՆ-ում նախնական և միջնակարգ կրթության հարցերը, որպես կանոն, տնօրինում են նահանգային իշխանությունները, բայց դաշնային իշխանությունն էլ որոշ օգնություն է տրամադրում։
Նախագահ Դոնալդ Թրամփի Թվիթերում մի շարք գրառումներ է տեղադրել՝ պահանջելով չհետաձգել ուսումնական տարվա մեկնարկը և դաշնային օգնությունից զրկել պահանջն անտեսող նահանգներին։
Նախագահի թվիթերյան սպառնալիքներին արձագանքել է Կալիֆորնիայի նահանգապետ Գավին Նյուսոմը։
«Ինձ չեն վախեցնում այդ գրառումները, կարող եմ ներկայացնել արդեն սրտխառնոց առաջացնող բազում փաստարկներ, որոնք թույլ են տալիս ասել, որ դա չէ մեր համար կարևոր խնդիրը։ Իսկ այն, ինչն իսկապես կարևոր է, շատ հստակ է՝ մենք դպրոցների աշխատանքը պետք է վերսկսենք հիմնարար սկզբունքներով, դրանց շուրջ բանակցություններ չեն լինի։ Մենք պարտավոր ենք ապահովել դպրոցների անվտանգությունը, միայն դրանից հետո է հնարավոր սկսել ուսումնական տարին», - ասել է Կալիֆորնիայի նահանգապետը՝ հորդորելով նահանգի բնակիչներին հետևել վիրուսից պաշտպանվելու տարրական կանոններին։
«Կոչ եմ անում ձեզ անել այն, ինչը հիմնարար է այս պահին․ կրեք դիմակներ, պահպանեք սոցիալական հեռավորությունը, հնարավորինս հաճախ լվացեք ձեռքերը, լավ մնացեք, վաղը կհանդիպենք», - տեսաուղերձում ասել է Գավին Նյուսոմը։
Կորոնավիրուսի թեման հիմա առանցքային տեղ ունի նաև նոյեմբերին կայանալիք նախագահական ընտրությունների համատեքստո...
