Ընդդիմադիր «Ելք» դաշինքն այսօր երթ անցկացրեց ընդդեմ թանկացումների և հարկային բեռի ավելացման:
Բողոքի երթը մեկնարկեց Շառլ Ազնավուրի անվան հրապարակից: Ցուցարարները երթի առջևից հրելով տանում էին հնամաշ, անսարք մի ավտոմեքենա՝ որպես Հայաստանի տնտեսության խորհրդանիշ:
Դաշինքի առաջնորդ Նիկոլ Փաշինյանը, հակադարձելով իրենց հասցեին հնչող քննադատությանը իբր իրենք պայքարում են թանկացումների և ոչ թե թանկացնողների դեմ, քաղաքական հարցեր չեն բարձրացնում, ասաց, որ սա «ամենաքաղաքական հարցերից մեկն է»:
«Ազատության» հարցին, թե արդյոք բարձրացնելու են Սերժ Սարգսյանի պաշտոնանկության հարցը, Փաշինյանն արձագանքեց․ - «Ես պարտավորություն եմ ստանձնել՝ այն պահին, երբ որ ես այդ պահանջը հնչեցնեմ, դա հանրայնորեն ձևակերպված լինի, ուրեմն դա պետք է տևի յոթ օր: Այսինքն, ես չեմ համաձայնվի ձևակերպել պահանջ, հետո հինգ հետո բացատրել, թե ինչու այդ պահանջը չիրականացավ»:
Դաշինքի անդամ, «Հանրապետություն» կուսակցության ղեկավար Արամ Սարգսյանը իր ելույթում հայտարարեց, որ մարտ-ապրիլ ամիսներին իրենց հավաքները շատ ավելի բազմամարդ լինեն, երբ մարդիկ իրենց գրպանի վրա կզգան թանկացումները, սոցիալական բեռի ավելացումը․ - «Այս պահի դրությամբ այստեղ հավաքվել են այն մարդիկ, ովքեր քաղաքական են: Բայց վաղը, մյուս օրը, մարտին, ...