Ղարաբաղյան շարժման երեսնամյակը, ըստ կալանավորված ընդդիմադիր գործիչ Անդրիաս Ղուկասյանի, Հայաստանը դիմավորում է անորոշության մեջ:
«Անորոշության մեջ է», - այսօր դատական նիստից առաջ «Ազատության» հարցին արձագանքեց արդեն մեկուկես տարի կալանքի տակ գտնվող Ղուկասյանը: - «Պարզ չի, թե ինչպես կարող ենք ճանաչել անկախությունը Արցախի: Անզոր է մեր իշխանությունը»:
Անդրիաս Ղուկասյանը մեղադրվում է Սարի թաղի դեպքերի գործով․ այն բանի համար, 2016 թվականի հուլիսի 29-ին կազմակերպել է զանգվածային անկարգություններ, փորձել է միանալ Ոստիկանության Էրեբունու գնդի տարածքը զավթած «Սասնա ծռերին», զինվել և խմբի անդամների հետ շարունակել է պահել պատանդներին: Սակայն, ըստ դատախազության, Ղուկասյանը իր մտադրությունը ավարտին չի հասցրել՝ իր կամքից անկախ պատճառներով:
Այսօրվա դատական նիստի ընթացքում հարցաքննվեց մեղադրական կողմի հրավիրած մի քանի տասնյակ վկաներից մեկը: Նա նշեց, թե Անդրիաս Ղուկասյանին անձամբ չի ճանաչում, Ազատության հրապարակ էր եկել հանրահավաքին մասնակցելու, կոչեր չի լսել, ապա հավաքվածների հետ շարժվել է դեպի Սարի թաղ․ - «Հետաքրքրությունից դրդված գնացի միացա ցույցին՝ տեսնեմ ինչ ա կատարվում, ոնց ա կատարվում»:
Այս գործում առանցքային հարցերից մեկն է՝ արդյո՞ք քարեր նետվել են դեպի ոստիկանները, այդ քայլերը նետվել են ոստիկանական գործողություններից առա՞ջ, թե՞ հետո, ովքե՞ր են նետողները: Վկան ասաց, թե ինքը քար չի նետել, տեսել է մի քանի հոգու, ովքեր քարեր են նետել այն բանից հետո, երբ ոստիկանները սկսել են պայթուցիկներ օգտագործել․ - «Սկզբից ոստիկանները փորձեցին թեթև վախեցնել, հետո մինչև ուժգին կրակոցները․․․ քարերը էդ միջակայքում ա եղել: Սկզբից ոստիկանները մի երկու անգամ փորձեցին հրահրել, կամ վախեցնել, ցրել, այդ ընթացքում ա եղել»:
Վկայի խոսքով՝ ինքը լսել է, որ երթի մասնակիցները կոչեր են արել քարերով չհարվածել ոստիկաններին: Հարցրին, թե արդյոք երթի ընթացքում խոսք եղել է հնարավոր սադրիչների մասին, նա պատասխանեց, թե կարող է ենթադրել, որ ցույցի մասնակիցների շարքում եղել են նաև քաղաքացիական հագուստով ոստիկաններ, քանի որ նրանք «ավելի մեղմ վերաբերմունքի» էին արժանանում:
Անդրիաս Ղուկասյանի պաշտպան Կարեն Մեջլումյանը դատարանում հայտարարեց՝ թեև մեղադրանքը նշում է, որ տասնյակ մարդիկ քարեր են նետել, իսկ ոստիկանները իրենց ցուցմունքներում շեշտել են, որ քարեր նետողների են բերման ...