Իրանի գերագույն հոգևոր առաջնորդ Ալի Խամենեին արձագանքել է 2015 թվականի միջուկային համաձայնագիրը խզելու և նոր պայմաններ ներկայացնելու՝ Վաշինգտոնի որոշմանը:
«Իսլամական հանրապետությունը չի կարող համագործակցել մի կառավարության հետ, որը հեշտությամբ հրաժարվում է համաձայնեցված միջազգային փաստաթղթերից, թատերական բեմականացումներով հայտարարում է պայմանագրից իր ստորագրությունը հետ վերցնելու մասին»,- ասվում է Խամենեիի պաշտոնական կայքում տեղադրված ուղերձում:
Թվարկելով տասնամյակների ընթացքում Իրանի նկատմամբ Միացյալ Նահանգների վարած քաղաքականության օրինակները, Խամենեին ընդգծել է, որ Թեհրանը չի կարող գործ ունենալ Ամերիկայի հետ:
«Ինչո՞ւ, որովհետև Ամերիկան հավատարիմ չէ պայմանագրերին: Ամերիկայի ներկայիս նախագահը կարժանանա այն նույն ճակատագրին, որին ժամանակին արժանացել են նախորդները՝ Բուշը, Ռեյգանը, նեոկոնսերվատորները, իսկ Իրանը կհաղթի»,- ասվում է ԻԻՀ գերագույն հոգևոր առաջնորդի ուղերձում: «Կասկած չկա, որ Ամերիկան կպարտվի այն դեպքում, եթե Իրանի պաշտոնյաները մինչև վերջ կատարեն իրենց պարտականությունները»,- նաև պնդել է Խամենեին:
Թեհրանը հիմա մի շարք նախապայմաններ է ներկայացնում Եվրոպային, նկատել տալով, որ պատրաստ է կատարել 2015 թվականի համաձայնությունն այն դեպքում, եթե Եվրոպան կերաշխավորի Իրանի շահերը: Խամենեիի պնդմամբ, «երբ Ամերիկան դուրս եկավ պայմանագրից՝ Եվրոպան լռեց, հիմա եթե Եվրոպան ուզում է, որ Իրանը հարգի պայմանագիրը՝ պետք է ընդունի բանաձև, որով կդատապարտի ԱՄՆ-ի կողմից ՄԱԿ-ի Անվտանգության խորհրդի թիվ 2231 բանաձևի խախտումը»:
Այդ բանաձևով ՄԱԿ-ը հավանություն էր տվել 2015 թվականի միջուկային պայմանագրին և չեղարկել Իրանի միջուկային հարցի վերաբերյալ նախկինում ընդունած բանաձևերը:
Երկրորդ պահանջը՝ «Եվրոպան չպետք է արծարծի Իրանում հրթիռներ ստեղծելու ծրագրի հարցը և չպետք է փորձի ազդել տարածաշրջանում Իրանի քաղաքականության վրա»: Երրորդը՝ «Եվրոպան պետք է հակազդի Իրանի նկատմամբ Վաշինգտոնի սահմանած պատժամիջոցներին»: «Եվրոպան պետք է երաշխավորի, որ իրանական նավթն ամբողջությամբ կվաճառվի: Եթե Ամերիկան փորձի խոչընդոտել մեր նավթի վաճառքը, մենք պետք է ստանանք մեր նավթը ցանկացած ծավալով վաճառելու հնարավորություն»,- պնդում է Թեհրանը:
Բացի այդ, Խամենեին պահանջում է, որ եվրոպական բանկերը երաշխավորեն Իրանի հետ գործառույթների անխափանությունը: «Մենք Մեծ Բրիտանիայի, Ֆրանսիայի և Գերմանիայի հետ խնդիր չունենք, բայց ելնելով մեր փորձից՝ չենք վստահում այդ եր...
