Անկախության հռչակագրի ընդունման առթիվ ավանդույթի համաձայն լրագրողներին է հանդիպել հռչակագիրը 29 տարի առաջ Գերագույն խորհրդում ընթերցած պատգամավոր Արամ Մանուկյանը:
Նա լրագրողներին հորդորեց տոնել անկախությունը, շնորհավորել հռչակագրի ընդունման օրը:
Իշխանությանն էլ հիշեցրեց՝ իրենց թիվ մեկ առաքելությունը Հայաստանի անկախության պաշտպանությունն է:
«Անկախության հռչակագիրը ընդունելի եղել է և մնում է բոլոր քաղաքական ուժերի համար: Մեր ամենաոխերիմ քաղաքական հակառակորդները որևէ բան Անկախության հռչակագրի մասին չեն ասում: Սա իսկապես համազգային համաձայնության արդյունքում ծնված փաստաթուղթ էր: Դրա մեջ է նաև իր ուժը, իր հզորությունը, իր պատմականությունը: Եվ այն դարձավ մեր Սահմանադրության հիմքը», - նշեց Մանուկյանը՝ շարունակելով․ - «Մի հատ կոպիտ խոսք ունեմ, երբեմն կրկնում եմ․ պետությունն ու իշխանությունը անկախության շունն են՝ պահապանը: Ով ուզում ա գա, ինչ իշխանություն ուզում ա գա, ինչ կուսակցություն ուզում ա լինի՝ նրա թիվ մեկ առաքելությունը պետք ա լինի իր երկրի սուվերենությունը՝ անկախությունը պահպանելը»:
Անկախությունը գերագույն արժեք է, սակայն Ռոբերտ Քոչարյանի և Սերժ Սարգսյանի իշխանության օրոք Հայաստանի անկախությունը, ինքնիշխանությունը մսխվել է, քննադատեց Հայ ազգային կոնգրեսի փոխնախագահ Արամ Մանուկյանը: Միևնույն ժամանակ՝ դժգոհեց նաև գործող իշխանությունից, ասաց՝ թեև ծանր ժառանգություն են ստացել նախորդներից, բայց, Նիկոլ Փաշինյանի ղեկավարած ուժին էլ անկախությունը պահպանելու գործում պակասում է՝ «իրատեսությունը, հաշվարկները, սառը հաշվարկը»:
ՀԱԿ ներկայացուցիչը դժգոհ է գործող իշխանության արտաքին քաղաքականությունից, ասաց՝ Լեռնային Ղարաբաղի խնդրի կարգավորման հստակ ծրագիր չունեն:
Արդարադատության, տնտեսական ոլորտներում հռչակած հեղափոխական քայլերն էլ, ըստ նրա, դեռ տեսանելի չեն․ - «Այսօրվա իշխանությունները հստակ չեն արտահայտում (ինձ գոնե դա չի բավարարում) իրենց դիրքորոշումները Ղարաբաղի հարց...
