Իրանի Իսլամական Հանրապետության իշխանությունները կոչ են անում շիա մահմեդականների սրբազան Ղոմ քաղաքի հոգևորականներին զերծ մնալ ուրբաթօրյա կրոնական արարողությունների` մզկիթներում նամազի անցկացումից, մարդկանց կուտակումներից խուսափելու նպատակով:
Պաշտոնական Թեհրանն Իսլամական Հանրապետության 40-ամյա պատմության ընթացքում նման աննախադեպ քայլի է դիմում Ղոմում կորոնավիրուսի նոր դեպքերի հայտնաբերման պատճառով:
Փետրվարի 19-ին Ղոմում կորոնավիրուսի հետևանքով մահվան միանգամից երկու դեպք էր արձանագրվել: Նախօրեին արդեն քաղաքում ևս երկու նոր վարակակիր էր ի հայտ եկել` Իրանի տարածքում հայտնաբերված կորոնավիրուսի դեպքերի ընդհանուր թիվը հասցնելով հինգի:
Իրանի առողջապահության նախարարության պաշտոնյաների խոսքով՝ կորոնավիրուսի բոլոր դեպքերը, բացի մեկից, հայտնաբերվել են Ղոմում: «Եվս մի վարակակիր է հայտնաբերվել Արաք քաղաքում, դա նախորդ օրերին Ղոմ այցելած մի բժիշկ է», - հաղորդում է ISNA գործակալությունը` հավելելով, որ բոլոր տուժածներն Իրանի քաղաքացիներ են:
Կորոնավիրուսի վարակի բռնկումն Իրանում արձանագրվեց մի քանի ժամից մեկնարկող խորհրդարանական ընտրությունների նախաշեմին: Իրանում կարծիք է հնչում, որ դա կարող է լրջորեն ազդել Մեջլիսի ընտրություններին քվեարկողների մասնակցության ցուցանիշի վրա: Թեհրանի որոշ բնակիչներն էլ կարծում են, որ այս երկու խնդիրները միմյանց հետ շատ քիչ առնչություն ունեն:
«Մարդիկ, որոնք կուզեն գնալ ընտրատեղամասեր, այսպես թե այնպես գնալու են: Վիրուսն ու ընտրութ...