Գեներալ Մանվել Գրիգորյանի պաշտպանական կողմն այսօր կրկին միջնորդեց գրավի դիմաց կալանքից ազատ արձակել Ազգային ժողովի նախկին պատգամավորին: Դատարանը, սակայն, մերժեց միջնորդությունը՝ հերթական անգամ այն անհիմն համարելով:
Նման միջնորդություններ Գրիգորյանի փաստաբանները ներկայացնում են շաբաթը մեկ անգամ անցկացվող գրեթե բոլոր դատական նիստերին:
Փաստաբանը շարունակում է պնդել, որ նախկին պատգամավորի առողջական վիճակը ծանր է․ - «Գրիգորյանի նկատմամբ խափանման միջոց կալանավորումը չփոխելը նման պայմաններում դատարանի կողմից դիտում ենք անօրինական և խոշտանգում՝ բխող բոլոր իրավական հետևանքներով: Անձը ունի բժիշկների կարիք, անձը չի կարողանում այդ օգնությունը ստանալ»:
Մանվել Գրիգորյանին միջգերատեսչական դատաբժշկական փորձաքննություն ենթարկելու նպատակով ձևավորված հանձնաժողովի կազմում այսօր ևս 3 բժիշկներ ներգրավվեցին։ Դատարանը նրանց նախազգուշացրեց, որ կեղծ կամ ոչ ճշգրիտ եզրակացություն տալու դեպքում պատասխանատվության կենթարկվեն։
Հանձնաժողովը մի շարք հարցերի պատասխաններ պետք է տա: Մասնավորապես՝ Գրիգորյանի հիվանդությունները համատեղելի՞ են կալանքի հետ, թե՞ ոչ։ Պաշտպանները պնդում են, որ Գրիգորյանը մի քանի տասնյակ հիվանդություններ ունի, այդ թվում՝ թոքի քաղցկեղ ու դիաբետ:
Պաշտպան Լևոն Բաղդասարյանը դժգոհեց, թե տևական ժամանակ է, ինչ հանձնաժողովը եզրակացությունը չի տալիս և հիմա՝ երկու ամիս անց, կրկին նոր փորձագետներ են ներգրավվում․ - «Նախկին փորձագետները ձևավորվեցին երկու ամիս առաջ, երկու ամիս հետո նոր փորձագետներ են ձևավորվում: Այսինքն ենթադրվում է, որ ևս երկու ամիս այդ փորձագետները պետք է աշխատեն»:
Լևոն Բաղդասարյանը մեկ այլ միջնորդությամբ էլ հանդես եկավ։ Ասաց՝ Գրիգորյանին պատկանող որոշ շարժական և անշարժ գույքեր, որոնք այս քրեական գործի շրջանակներում կալանքի տակ են առնված, օգտագործվել են երրորդ անձանց կողմից, վարձակալման էր տրված, սակայն այս պահին, արգելանքի տակ լինելու պատճառով, վարձակալման պայմանագրերը հնարավոր չէ թարմացնել:
Փաստաբանը խնդրեց, որ գույքի նկատմամբ կալանքը հանվի․ - «Վերջին հաշվով դա նաև գույքի պահպանման հետ կապված մեծ նշանակություն ունի»:
Անցած տարի, երբ ԱԱԾ-ն խուզարկություն իրականացրեց Գրիգորյանին պատկանող տարածքներո...
