Վաշինգտոնի կողմից Իրանի դեմ սահմանված նոր պատժամիջոցների թիրախը իսլամական հանրապետության ամենաազդեցիկ գործիչն է` երկրի գերագույն հոգևոր առաջնորդ Ալի Խամենեին:
Ուշագրավ է, որ ԱՄՆ նախագահ Դոնալդ Թրամփը, հրամանագիրը ստորագրելու ընթացքում երկուշաբթի երեկոյան Ալի Խամենեիին համառորեն Խոմեյնի էր անվանում:
«Այաթոլա Խոմեյնիի և նրա գրասենյակի միջոցները պատժամիջոցներից զերծ չեն մնա: Մենք համարժեք պատասխանի ենք արժանացնում Իրանի սադրիչ գործողությունները և շարունակելու ենք սաստկացնել ճնշումը Թեհրանի նկատմամբ», - Սպիտակ տանը հայտարարել է Միացյալ Նահանգների նախագահ Դոնալդ Թրամփը:
Սրան զուգահեռ ԱՄՆ Ֆինանսների նախարար Սթիվեն Մնուչինը Վաշինգտոնում հրավիրված մամուլի ասուլիսի ժամանակ նշել է, որ ամերիկյան նոր պատժամիջոցների շնորհիվ Խամենեին և նրա շրջապատը կզրկվեն միլիարդավոր դոլարներ կազմող ֆինանսական ակտիվներից օգտվելու հնարավորությունից:
Մնուչինը նաև չի բացառել, որ առաջիկա օրերին թիրախային պատժամիջոցների հերթական զոհը կարող է դառնալ Իրանի կառավարության թերևս ամենակառուցողական դիրքորոշում ունեցող պաշտոնյան` Արտաէին գործերի նախարար Մոհամադ Ջավադ Զարիֆը:
«Այս բոլոր պատժամիջոցներն էլ շատ կարևոր են, հատկապես վերջին զարգացումների համատեքստում: Նախագահն ինձ հրահանգել է, որպեսզի այս շաբաթվա ընթացքում թիրախավորվի նաև Զարիֆը», - հայտարարել է Մնուչինը:
«Գերագույն առաջնորդի և Իրանի դիվանագիտության ղեկավարի դեմ նման անիմաստ պատժամիջոցների սահմանումը վերջնականապես փակում է դիվանագիտական լուծումների հնարավորությունը», - արձագանքելով վերջին զարգացումներին՝ Twitter-ում գրել է Իրանի արտգործնախարարության մամուլի քարտուղար Աբաս Մուսավին:
«Խելագարություն»․ այսօր Թեհրանում հրավիրած խորհրդակցության ժամանակ այսպես բնութագրեց Վաշինգտոնի վերջին գործողությունները Իրանի նախագահ Հասան Ռոհանին:
«Սպիտակ տան գործողությունները մտավոր հետամնացության վառ դրսևորում են: Դե ինչ արած, մարդը խելագարվել է և հիմարություններ է անում: Ո՞րն է պետ...