ՊԵԿ նախագահ․ Բյուջեի մուտքերն այս տարի էապես մեծանալու են

Կառավարության այսօրվա նիստը մեկնարկեց բանավեճով:

Վարչապետ Նիկոլ Փաշինյանը Սննդամթերքի անվտանգության պետական ծառայության պետ Իշխան Կարապետյանից բացատրություն էր պահանջում, թե ինչու մայիսի 10-ին և 16-ին նամակներ ստանալով ռուսական «Ռոսսելխոսնադզոր» կազմակերպությունից՝ իրեն տեղյակ չի պահել․ - «Ես ուզում եմ հասկանալ, Դուք ո՞ւմ եք զեկուցել, որ էսպիսի իրավիճակներ կան, երբ որ կոնկրետ խնդրանքով են դիմում Ռուսաստանի մեր գործընկերները մեզ, կոնկրետ իրավիճակ են ներկայացնում, և հարցը ունի շատ կարևոր նշանակություն: Ես ուզում եմ իմանալ ում եք զեկուցել: Ես վարչապետի պաշտոնը ստանձնելով՝ առաջին գործողություններից մեկը եղել է հետևյալը․ ես զանգել եմ Ձեզ և հարցրել եմ, թե արդյոք մենք խնդիրներ ունենք գյուղմթերքի արտահանման ոլորտում, և Դուք ասել եք, որ ըստ էության խնդիր չկա: Մեր խոսակցությունից հետո Դուք ստացել եք երկու նամակ: Իմանալով, որ ես այդ հարցով շատ հետաքրքրված եմ․․․ Ինձ հետաքրքիր է, Ձեր գործողությունները նկարագրեք, և ո՞ւմ եք զեկուցել»:

Իշխան Կարապետյանը փորձում էր բացատրել․ - «Պարոն վարչապետ, աշխատանքային կարգով քննարկում ենք ունեցել, նաև ես խոսել եմ «Ռոսսելխոսնադզորի» ղեկավարի հետ հեռախոսով․․․»

Փաշինյանն ընդհատեց․ - «Դուք իմ հարցը ճիշտ չհասկացաք: Ո՞ւմ եք զեկուցել Կառավարության անդամներից, Գյուղատնտեսության նախարարին զեկուցե՞լ եք, փոխվարչապետերին զեկուցե՞լ եք, վարչապետին զեկուցե՞լ եք»:

«Քննարկում է եղել նաև Գյուղատնտեսության նախարարի հետ: Ես փորձել եմ կապվել նաև պարոն Միրզոյանի հետ, սակայն չի ստացվել: Եվ այդ իսկ պատճառով․․․ գործողությունները իրականացվել են»:

Նիկոլ Փաշինյանը հայտնեց, որ ռուսական կողմից ստացված նամակներում բարձրաձայվել են Հայաստանից արտահանված լոլիկի հետ կապված սանիտարական խնդիրներ, և բեռը հետ է ուղարկվել․ - «Եթե այս իրավիճակի կրկնությունը մենք կունենանք, ես հույս ունեմ, որ չենք ունենա: Ինչի մասին է խոսքը․ որ գյուղմթերքների արտահանումը իրականացվի պահանջներին խստիվ համապատասխան, և Դուք պարտավոր եք դա ապահովել: Եվ ակնկալում եմ, որ այս հարցը մենք քննարկում ենք վերջին անգամ»:

Վարչապետն այսօր անդրադարձավ նաև նախորդ նիստում իր հանձնարարակին՝ լուծում տալ վարորդների դժգոհությունը հարուցած արագաչափերի և տեսախցիկների հարցին՝ թեկուզ դրանց գործունեության ժամանակավոր կասեցմամբ:

Ոստիկանապետ Վալերի Օսիպյանը զեկուցեց, որ 2012-2017 թվականների ընթացքում չմուծված տուգանքների համար համաներում է լինելու․ - «Կան քաղաքացիներ, որոնք անգամ դժգոհեցին այս մեր որոշման, մեր հայտարարության հետ կապված: Շատ պարզ պատճառով․ իրենք ասում են՝ բարեխիղճ քաղաքացիները, ովքեր վճարել են, վերադարձրեք մեր գումարները»:

Վարչապետն ասաց․ - «Շատերը չեն վճարել, որովհետև չեն ունեցել: Պարոն Միրզոյանն է ասում վճարել ա...