Հայաստանը մինչ տարեվերջ ավելի շատ մոտ կլինի երկնիշ տնտեսական աճին` անդրադառնալով Արժույթի միջազգային հիմնադրամի (ԱՄՀ) կանխատեսմանը, երեկ կառավարության նիստից հետո կարծիք հայտնեց Էկոնոմիկայի նախարար Վահան Քերոբյանը։
«Շատ ֆակտորներից է կախված, բայց ես դեռևս մնում եմ այն կարծիքին, որ անվանական արժեքով ՀՆԱ-ն կաճի շատ ավելի շատ, քան երկնիշը, կաճի երևի 15-ից 20 տոկոսով, բայց ունենք բավական մեծ դեֆլյատոր, այսինքն՝ գնաճի ճշգրտումը, որը նվազեցնում է և, այնուամենայնիվ, ես կարծում եմ, որ մենք շատ մոտ կլինենք երկնիշ տնտեսկան աճին՝ իրական թվերով», - ասաց Քերոբյանը։
Մինչդեռ Արժույթի միջազգային հիմնադրամի կանխատեսմամբ, Հայաստանը տարին կփակի 6,5 տոկոս տնտեսական աճով։
Էկոնոմիկայի նախարարը հիշեցնում է՝ Արժույթի միջազգային հիմնադրամն ավելի վաղ 2021-ի համար մոտ 1 տոկոս տնտեսական աճ էր ակնկալել։
«Այս պահին կարող ենք համարել, որ էդ 6,5 տոկոսը գործող հնարավոր կանխատեսումներից ամենահոռետեսականն է։ Օրեցօր փոխվում են կանխատեսումները։ Մենք այսօր ունենք առաջին յոթ ամսվա ցուցանիշները՝ 5,2 տոկոս, երեքշաբթի օրը Կենտրոնական բանկը կանխատեսեց 5,4 տոկոս, որը, կարծում եմ, էլի շատ պեսիմիստիկ գնահատական է», - ասաց Էկոնոմիկայի նախարարը։
Տարին երկնիշ տնտեսական ցուցանիշին մոտ արդյունքով փակելու վերաբերյալ նախարարի կանխատեսումն անտրամաբանական է, ասում է տնտեսագետ Սուրեն Պարսյանը։
Ըստ նրա՝ նախարարի նշած ցուցանիշը հիմնված չէ տնտեսական հաշվարկի վրա, այլ արվել է քաղաքական նպատակահարմարությունից ելնելով։ «Եթե մենք ցանկանում ենք կամ փորձում ենք հասնել 10 տոկոսին մոտ տնտեսական ակտիվությանը, ապա պետք է նշեմ, որ այդպիսի հիմքերը չունենք այս 7 ամիսների ընթացքում, և կարող եմ նշել, որ կշարունակվի այս աճի տեմպը հաջորդ ամիսների ընթացքում, և ԱՄՀ-ի կանխատեսումն, ըստ էության, ավելի իրատեսական է և տրամաբանական», - ասաց տնտեսագետը։
Սուրեն Պարսյանի խոսքով՝ այնուամենայնիվ Արժույթի միջազգային հիմնադրամ...
