Գյումրիի դրամատիկական թատրոնը պատրաստվում է 156-րդ թատերաշրջանին: Աճեմյանցիները հանդիսատեսին երեք պրեմիերայով են ներկայանալու:
Առաջին ներկայացումը Վիլյամ Սարոյանի «Փրկության կղզին» պիեսն է, որը բեմադրել է ռեժիսոր Նիկոլայ Ծատուրյանը: Թատրոնի տնօրեն Լյուդվիգ Հարությունյանն ասում է՝ մեր օրերի համար խիստ անհրաժեշտ բեմականացում է:
«Ներկայացում է, որտեղ խոսվում է բարության, հոգատարության ու սիրո մասին։ կարծում ենք, որ առավել ևս այսօր, այն ժամանակներում, ինչ մենք ենք ապրում, այս պիեսը բավականին արդիական է ու պետք է հանդիսատեսին։ Այս ներկայացումը նաև դպրոցականների համար ենք մենք նախատեսում, ծրագրային, որովհետև, կարծում եմ, յուրաքանչյուր դպրոցական ու յուրաքանչյուր աշակերտ պիտի դիտի Սարոյանի պիեսը», - «Ազատության» հետ զրույցում ասաց Հարությունյանը։
Թատրոնի փոքր բեմում ևս առաջնախաղ է նախատեսված: Երիտասարդ դրամատուրգ Բաբկեն Զաքարյանի «Քայլեր» պիեսը նույնպես արդիական է ու մարդու ապրելու իրավունքի մասին է:
«Այն թեման, ինչ արծարծվում է այս պիեսում, կարծում եմ, շատ կարևոր է։ Սա ապրելու իրավունքի մասին է, որ յուրաքանչյուր մարդ իրավունք ունի ապրելու և ինքն է որոշում, որևէ մեկն իրավունք չունի իր ճակատագիրը փոխել։ Ու համոզված եմ, որ այդ ներկայացումը հատկապես երիտասարդները շատ կսիրեն ու կընկալեն, որովհետև հասցեատերը երիտասարդներն են», - նշեց տնօրենը։
Թատրոնը վերջին 20 տարվա պատմության մեջ առաջին անգամ բավականին մեծ ֆինանսական ու մարդկային ռեսուրս պահանջող ներկայացում է բեմադրում՝ «Մաուգլի»-ն, որը ոչ թե մանուկների, այլ մեծահասակների համար է։ Ռիսկի են դիմել ու մեծ գումարներ ծախսել դեկորացիաների և հագուստների ձևավորման համար, ինչը, Լյուդվիգ Հարությունյանի կարծիքով, կարդարացնի ներկայացումը դիտող ցանկացած հանդիսատես:
«Փորձել ենք ինչքան հնարավոր է այսօր, 21-րդ դարում հնչեցնել ավելի ժամանակակից, այսօրվա շեշտադրումներով, և ներկայացումը չի լինելու ցերեկային, այլ...
