Հայաստանի կառավարության ներկայացուցիչների հետ ավելի քան 1.5 տարի առաջ կնքված առաջին հուշագրից հետո «Արագեյթ Ինվեսթմենթս» ընկերությունը դեռ սպասում է կառավարության վերջնական որոշմանը իրենց առաջարկած խոշոր՝ շուրջ 350 միլիոն դոլարի ներդրումային ծրագրի շուրջ։
Այս ընկերության խորհրդի անդամ, ֆրանսիական Société des 3 Vallées ընկերության տնօրեն Պասկալ դը Տիերսանթը վերջերս նամակ է գրել Հայաստանի վարչապետին՝ խնդրելով մի փոքր շտապել։
«Ես նամակ գրեցի վարչապետին՝ արագացնելու նախագիծը: Նա ուղիղ ինձ չի պատասխանել, բայց ես գիտեմ, որ կառավարությունում արդեն որոշակի շարժ կա, և նրանք պատրաստվում են ընդունել կառավարության որոշում, միայն դրանից հետո կկարողանանք անցնել հաջորդ փուլին, որը ողջ հանգստյան գոտու գլխավոր նախագծի մշակումն է: Այժմ ունենք միայն լեռնադահուկային գոտու նախագիծը, պետք է սկսենք ամբողջ տարածքի նախագծումը», - «Ազատությանն» ասաց նա։
Ընկերությունն արդեն մեծ աշխատանք է արել՝ նախագծելով լեռնադահուկային գոտին, ֆրանսիացի մասնագետների մի քանի խմբեր տարբեր սեզոնների այցելել են Արագած, դահուկներով իջել են Արագածի փեշերով, ուսումնասիրություններ ու չափագրումներ արել` արդյունքում ստեղծելով նախագիծը։ Ըստ առաջարկի՝ ֆրանսիական մի քանի խոշոր ընկերություններ, որոնք կառուցել են Ալպերի հայտնի դահուկային համալիրները, համատեղ կստեղծեն 4 սեզոնի համար նախատեսված հանգստավայր Արագածի հարավային գագաթին՝ սահելու համար մոտ 80 ուղիներով և ընդհանուր ավելի քան 120 կմ դահուկուղիների երկարությամբ։ Տարածքում կլինեն նաև ոչ լեռնային սպորտաձևերի, ժամանցի, տեսարաններով հիանալու գոտիներ, ռեստորաններ և այլն։ Կգործի նաև ձնարտադրման համակարգ։
Պասկալ դը Տիերսանթի խոսքով՝ ուսումնասիրությունները ցույց են տվել, որ Արագածում արևային օրերը շատ են, գրեթե նույնքան որքան ֆրանսիական Ալպերում, ինչն էլ պատճառ է հանդիսացել Արագածն ընտրել որպես դահուկով սահելու հարմար վայր։
«Արագածը շատ հարմար է դահուկային հանգստավայրի համար, ամենալավ տեղն է, մոտ է Երևանին, բարձադիր է, ինչը մեզ պետք է նման երկարաժամկետ կառուցապատման համար, այն կատարյալ է», - նշում է Պասկալ դը Տիերսանթը։
Կառուցման առաջին փուլը տևելու է մոտ 3 տարի, ընդհանուր համալիրի կառուցումը՝ 10 տարի, իսկ ներդրումները կկազմեն 350 միլիոն դոլար: Գլխավոր ներդրողը ծագումով հայ, ռուսաստանցի գործարար Նիկոլայ Սարկիսովն է, սակայն կներգրավվեն նաև այլ ներդրումներ։
Պասկալ դը Տիերսան...
