Հայաստանի և Արցախի մարդու իրավունքների պաշտպաններն ահազանգում են, որ Ադրբեջանը շարունակում է անմարդկային վերաբերմունքը հայ ռազմագերիների նկատմամբ՝ այդպիսով ոտնահարելով միջազգային իրավունքի կոնվենցիաները։
Երեկ Յութուբում տեղադրվել է տեսանյութ, որտեղ ենթադրաբար ադրբեջանցի զինվորականը ութ հայ ռազմագերիներին հերթով ստիպում է կրկնել, որ Ղարաբաղը Ադրբեջանն է։
«Պարզել ենք՝ բոլորը հայ են, սա Ադրբեջանի հերթական ռազմական հանցագործությունն է»․ - ասում է Արցախի մարդու իրավունքների պաշտպան Արտակ Բեգլարյանը։ - «Մենք պարզել ենք, որ կեղծ տեսանյութեր չեն։ Եվ ադրբեջանցիներն են սա նկարել ու տարածել սոցիալական մեդիայում։ Քանի որ գերիները գտնվում են Արդբեջանի պետության վերահսկողության ներքո, ադրբեջական պետությունը հետևաբար կատարում է ապօրինի գործողություններ, միջազգային մարդասիրական իրավունքով չսահմանված գործողություններ, արգելված գործողություններ»։
Հայաստանի օմբուդսմեն Արման Թաթոյանն «Ազատության» հետ զրույցում ասաց, որ տեսանյութում երևացող ռազմագերիների մի մասի ընտանիքների հետ արդեն հանդիպել է, մարդու իրավունքների պաշտպանի իրավասության շրջանակում փորձում է առավելագույնն անել․ - «Նրանց ընտանիքների անդամների հետ մենք կապի մեջ ենք։ Երեկ երեկոյան արդեն ինձ մոտ մի քանի քննարկում եղավ»։
Վերջին օրերին ադրբեջանցիները մի քանի տեսանյութ են տարածել, որտեղ հայ ռազմագերիները ասում են, թե իբրև չեն ուզել պատերազմել, քանի որ Ղարաբաղը ադրբեջանական հող է, ասում է Արցախի մարդու իրավունքների պաշտպանը՝ հավելելով, որ այս պարտադրված տեքստը արտասանել են ադրբեջանցի զինվորականանների ճնշմամբ․ - «Ակնհայտ է, որ իրենց կամքին հակառակ բաներ են ասում և կատարում, ինչից ենթադրվում է, որ նրանք ենթարկվել են լուրջ ճնշումների ու նվաստացումների։ Սրանով իրենք խախտում են և՛ ռազմագերիների՝ հանրային հետաքրքրասիրության առարկա չդառնալու սկզբունքը, կանոնը, և՛, հաշվի առնելով նրանց խոսքի բովանդակությունը, նրանց վարքը, ակնհայտ է, որ նաև արժանացել են անմարդկային վերաբերմունքի»։
Ադրբեջանում գտնվող ռազմագերիների թվի մասին ստույգ տեղեկություն դեռ չկա։ Ըստ Արցախի ՄԻՊ-ի հաշվարկների, մինչև այս պահը ռազմագերիների նկատմամբ անմարդկային վերաբերմունքի 14 դեպքի մասին է իրենց հայտնի դարձել․ - «Ռազմագերիների առումով, եթե չեմ սխալվում, ըստ մեր հաշվարկի, ապացուցված արդեն 14-ից ավելի դեպք կա, որ հստակ ռազմագերիներ են, և նրանք անմարդկային վերաբերմունքի են արժանացել»։
Բեգլարյանն ասաց, որ այս տեսանյութերն արդեն փոխանց...
