«Ինձ միշտ հետաքրքիր էին պատից այն կողմ պատմությունները, որոնք մենք չենք տեսնում իրականում, քաղաքի այն վայրերը, որոնց կողքով անցնում ենք, ներս էլ չենք մտնում»,- ասում է կինոօպերատոր Սուրեն Թադեւոսյանը, որ ՀայԱրտ մշակութային կենտրոնում այս օրերին ներկայանում է հեղինակային «Ռենտգեն Երեւան» ցուցահանդեսով։ Ինքնատիպ տեխնիկայի կիրառման շնորհիվ Սուրենին հաջողվել է ստանալ թվային պատկերների շարք, որ դիտողին թույլ է տալիս խաղալ սեփական երեւակայության հետ, քաղաքին ու մարդկանց նայել նոր հայացքով՝ ռենտգեն մեթոդով։ Ցուցահանդեսի միտքը, ինչպես հեղինակն է նշում, եղել է դեռ 2019 թվականից, երբ նախորդ ցուցահանդեսից հետո սկսել է աշխատել նոր էսքիզների վրա․«Քաղաքում տեղեր կան՝ ման ենք գալիս, տեսնում ենք՝ պատ կա, դուռ կա, դալաններ կան, բայց դրանցից այն կողմ չենք էլ մտնում, նայում ենք՝ սիրուն է, անցնում ենք։ Այդպես մի օր անցնում էի Պուշկին փողոցով, մի սիրուն սպիտակ դուռ տեսա, ներսում մի տատի էր, հենց ուզում էի նայել, դուռը փակեց։ Մտածեցի՝ ինչու է պախկվում (ժպտում է,- հեղ․)։ Հետո մտքովս անցավ՝ երեւի այնտեղ ինչ-որ բան ունի պահած։ Երեւակայորեն կարծես երկրորդ շերտ տեսնեի, հետո՝ երրորդ։ Ու այդպես զարգացավ միտքը, որ կարելի է քաղաքի մեջ ինչ-որ շերտեր տեսնել ռենտգենի նման, այսինքն՝ կարողանաս նայել՝ երրորդ պլանում ինչ կա։ Պարզ է՝ դա վերածվում է երեւակայականի, թե ինչ կպատկերացնես, դառնում է արդեն քո պատմությունների շարքից»,- BRAVO.am-ի հետ զրույցում նկատում է Սուրենը։
Խոսելով կիրառած տեխնիկայի մասին՝ հեղինակը նշում է, որ իր պատկերացրած շերտերի բաժանումը չէր կարող մեկ լուսանկարով ստանալ, պիտի առանձին պատկերներ լինեին, որ կարողանար տեղաշարժել դրանք, համադրել իր երեւակայածով։ Այդպես որոշել է ամեն շերտն առանձին նկարել, ամեն տեսարանը, նույնիսկ մարդկանց։ Ցուցադրված պատկերներից մեկում, օրինակ, համբույրի տեսարան է, իսկ զույգն իրականում չի էլ հանդիպել։ Սուրեն Թադեւոսյանն ինքն է պատկերները համադրելով ստացել այդ տեսարանը․«Ի...