Ծաղկագրեր, թռչնագրեր, կենդանակերպ տառեր ու վարդյակներ. հայոց գրերի գեղարվեստական հմայքը, ավելի քան 4 տասնյակ կտավի տեսքով, ներկայացվել է Գյումրիում: «Տառերի ճախրանը» Լիբանանում ծնված եւ հայրենիքում ընտանիքով հաստատված Արմենուհի Սաղդասարյանի երկրորդ անհատական ցուցահանդեսն է: Գյումրեցիներն ու զբոսաշրջիկները 14 օր հնարավորություն կունենան բացահայտել հայկական մատենագրության, մանրանկարչության, զարդանկարչության եւ զարդագրության պատմությունը:Հայոց տառերին նոր շունչ հաղորդելու Արմենուհու երեւակայության հիմքում երկրի, հայի ինքնության ու մեր մշակութային հարուստ ժառանգության նկատմամբ ունեցած սերն է: Որքան նուրբ է կտավի հիմք հանդիսացող մետաքսյա կտորը, նույնքան հեքիաթային՝ թռչնագրերի երկխոսությունը: «Սաղարթի» լուծումներն ինքնատիպ են, լի նոր շնչով ու գերղարվեստական յուրօրինակ լուծումներով: Հետաքրքիր են ոչ միայն տառերի ձեւն ու հորինվածքը, այլեւ ծաղկի, կենդանու, թռչունի վերածված տառի խորհուրդը:
«Պետք է գնահատել այն, ինչ ունենք՝ մեր մշակութային ժառանգությունը, տառն ու գիրը: Ես ընտրել եմ ոսկեղենիկ հայերենն ապրեցնելու իմ ճանապարհը: Ներկայացնում եմ թռչնագրերի երկխոսություն՝ ձգտելով գեղեցիկի կողքին արտացոլել նաեւ հոգեւորը: Ուզում եմ, որ այս կտավները դիտողը ցուցահանդեսից տանի մտորելու, ինքնաճանաչման, մերը գնահա...