Վարպետաց դասեր, երաժշտական երեկոներ, հանդիպում-քննարկումներ արվեստի, փիլիսոփայության եւ հոգեբանական թեմաների շուրջ, որոնց հիմքում գլխավորն է՝ թեյախմությունը։ Երեք գործընկերներին հենց այս գաղափարն է համախմբել մեկ նպատակի շուրջ, երբ որոշել են միասին հիմնել «Tea Spirit Lab»-ը եւ թեյախմության տարաբնույթ միջոցառումներ կազմակերպել ամենայուրօրինակ մշակութային վայրերում ու ամենահետաքրքիր մարդկանց մասնակցությամբ։ Վիկտորյա Օհանյանը (ակնաբույժ), Գոհար Շահսուվարյանը (բժիշկ-գենետիկ) եւ Հասմիկ Հայրապետյանը (կենսաբան-գենետիկ) միասին աշխատում են բժշկության ոլորտում, երկար տարիներ է՝ միմյանց ճանաչում են, եւ վերջին ժամանակների ցավալի իրադարձությունները նրանց ստիպել են ստեղծել մի մտերմիկ միջավայր, որտեղ մարդիկ կզրուցեն, կշփվեն, կկիսվեն ու մի պահ կհեռանան առօրյա դժվարություններից։
Այդպիսի մի առիթով էլ երեկ նրանք արտ-թեյախմության երեկո էին կազմակերպել մեծանուն գեղանկարիչ եւ քանդակագործ Երվանդ Քոչարի թանգարանում։ Միջոցառման հյուրերը շրջայցի ժամանակ բացահայտեցին տարածական նկարչության գաղտնիքները, այնուհետեւ դիտեցին վարպետին նվիրված ֆիլմը, հետաքրքիր զրույցի շուրջ համտեսեցին նրա նախընտրած աղանդերն ու յուրօրինակ համեմունքներով պատրաստված թեյերը։ Այս ամբողջ ընթացքն ուղեկցվեց Ծովինար Ամիրյանի կատարումներով, որոնց շարքում ինչպես դասական եւ օպերային գործեր էին (պարզվում է՝ մաեստրոն սիրել է աշխատելիս երգել այս ոճի ամենատարբեր ստեղծագործություններ, նույնիսկ իր գրածները), այնպես էլ հայկական։ Երեկոյի վերջին հատվածում էլ ներկաները հնարավորություն ունեցան իրենց հետաքրքրող հարցերն ուղղել Քոչարի որդուն՝ կինոռեժիսոր, սցենարիստ Ռուբեն Քոչարին։
«Թեյախմությունը մտերմիկ շփման ամենահին եւ, իհարկե, հաճելի միջոցներից է, որը թույլ է տալիս ոչ միայն վայելել թեյը, նրա բույրը, բուժիչ հատկությունները, այլեւ հնարավորություն է տալիս այդ ամենը համատեղել հետաքրքիր զրույցների, քննարկումների, վարպետաց դասերի, հաճելի երաժշտության եւ այլ ակտիվությունների հետ։ Ու քանի որ մենք այդ ամենին մեծ տեղ ենք տալիս, որոշեցինք համախմբվել ու միավորել յուրաքանչյուրիս ունակությունները, նախասիրություններն ու ծանոթությունները, ստեղծել ակումբային ձեւաչափ, որտեղ նույն հետաքրքրություններն ունեցող մարդիկ հաճույքով ժամանակ կանցկացնեն թեյի շուրջ»,- BRAVO.am-ի հետ զրույցում նշեց Գոհար Շահսուվարյանը։
Նա ընդգծեց՝ թեյախմության առավելություններից է նաեւ այն, որ մասնակցության համար չկա...