Տիկին Աշխենը լավ է հիշում Փաշինյանի խոստումները, որ վարչապետ դառնալուց հետո հայտարարում էր, թե երկրում 3 միլիոն վարչապետ կա, ու որ վարչապետի պաշտոնը վայելք չէ։ Զարմացած է, որ վայելք չէ, ինչո՞ւ են օրենքներ փոխում, իրենց համար արտոնյալ պայմաններ ստեղծում՝ Փաշինյանը, Ազգային ժողովի նախագահն ու նրանց ընտանիքները անձնական բժիշկներ ունենան, պետության հաշվին բուժվեն։
«Շատ բան եմ հիշում, որ հիմա ընդհանրապես չի կատարվում իր խոստումներից բռնած», - ասաց տիկին Աշխենը:
Ազգային անվտանգության ծառայությունն (ԱԱԾ) առաջարկում է փոխել հատուկ պետական պաշտպանության ենթակա անձանց անվտանգության ապահովման մասին օրենքն ու պետական բյուջեի միջոցների հաշվին ապահովել հանրապետության նախագահի, վարչապետի և Ազգային ժողովի նախագահի ու նրանց ընտանիքների անդամների բուժսպասարկումը։ Այս օրենքով միայն հանրապետության նախագահը իրավունք ուներ ունենալ անձնական բժիշկ։ Նախագիծը երեկվանից հանրային քննարկման է դրվել ու կրքեր բորբոքել։
Կառավարությունը սառեցնում է պետպատվերով բուժումը՝ պատճառաբանելով, թե բյուջեում փող չկա, իսկ ղեկավարության համար արտոնյալ պայմաններ ստեղծում, դժգոհում են մարդիկ։
«Եթե ամբողջ ժողովուրդը չի կարող պետպատվերով բուժվել, ինչո՞ւ իրենք պետք է այդ իրավունքն ունենան, ինչո՞վ են առավել հասարակ ժողովրդից», - ասաց քաղաքացիներից մեկը:
Իշխող «Քաղաքացիական պայմանագիր» խմբակցության պատգամավոր Հրաչյա Հակոբյանը, որ Փաշինյանի աներորդին է, զարմացած է՝ ինչո՞ւ հարցեր չկային, երբ նույն օրենքով հանրապետության նախագահին էր անձնական բժիշկ հատկացվել։
«Իսկ ինչո՞ւ հարց չէին առաջանում՝ ինչո՞ւ պետք է նախագահն օգտվի այս ծառայությունից, և հիմա, երբ որ վարչապետին է վերաբերում այս օրենքը, բոլորի մոտ այս հարցն է առաջանում՝ ինչո՞ւ ենք այդպես վերաբերվում, ինչո՞ւ ենք այդ խտրականությունը դնում», - ասաց Հակոբյանը:
Բայց Փաշինյանն է հայտարարել 3 միլիոն վարչապետի գոյության, ժողովրդի ու իշխանության հավասարության մասին։ Բացի այդ հետպատերազմական այս ծանր վիճակում ինչո՞վ էր հրատապ վարչապետի ու Աժ նախագահի ընտանիքների անվճար բուժման հարցը։
Իշխանական պատգամավորը կասկածում է, որ 3 միլիոն վարչապետի մասին Փաշինյանի խոսքերի իմաստը ճիշտ են հասկացել. «Դուք վարչապետի խոսքն ընկալել եք այնպես, որ երկրում կա 3 միլիոն վարչապետ, հետևաբար, 3 միլիոն մարդ պետք է ունենա անվտանգության աշխատակից, 3 միլիոն մարդ պետք է ունենա ծառայողական մեքենա, այդպե՞ս եք հասկացել վարչապետի հայտարարությունը, ես այդպես չեմ հասկացել»:
«Հայաստան» խմբակցության պատգամավոր Աննա Գրիգորյանին այս փոփոխությունը չի զարմացրել։ Փաշինյանի խոսքի ու գործի հակասության մասին բազմաթիվ օրինակներ կան, ասում է ընդդիմադիր պատգամավորը։
«Երեք տարի առաջ, երբ վարչապետն ասում էր՝ մեր երկրում կա 3 միլիոն վարչապետ, այսօր փաստացի դա որևէ ձևով չի դրսևորվում, վարչապետն ունի շատ մեծ լիազորություններ, տեսեք...
